L'ogna Alp Curtegns sur Radons ha survegnì enavos ses caracter natiral. Ils ultims onns avevan temporals purtà grondas quantitads da lozza e glera en la planira e chanalisà il curs da l'ual. Ussa è la cuntrada umida vegnida restabilida en in project da construcziun da 6 mais. Quai scriva la vischnanca da Surses en ina communicaziun.
Punt n'è betg pli accessibla per autos e tractors
Las mesiras las pli impurtantas tutgan la dischlocaziun da rempars artifizials, il dischlocaziun da sendas e d'infrastructuras or da l'ogna sco er la construcziun d'ina nova punt da 50 meters per peduns e per velocipedists.
-
Bild 1 von 3. La nova punt da peduns. Bildquelle: Vischnanca da Surses.
-
Bild 2 von 3. La stgargiada dal settember è gia stada al nov lieu da la plazza da chargiar muvel. Bildquelle: Vischnanca da Surses.
-
Bild 3 von 3. In ual lateral ch'è vegnì renatiralisà. Bildquelle: Vischnanca da Surses.
Er la plazza per chargiar muvel è vegnida spustada en in nov lieu dador l'ogna. In'aua laterala ch'era avant tratg en lingia è vegnida renatiralisada.
Nagins accidents
Malgrà cundiziuns meteorologicas pretensiusas durant la stad han las lavurs pudì vegnir realisadas senza accidents. Ils custs totals dal project muntan a 3,4 milliuns francs – inclusiv la sanaziun da deponias veglias. Il project è vegnì finanzià da la confederaziun, dal chantun, da la vischnanca da Surses, dal fond «naturmade» da l'Ovra electrica da Turitg e da la corporaziun d'alp Val Nandro.