La nova constituziun communala prevesa tranter auter, da mantegnair la structura d’organisaziun actuala e desister d’installar in parlament communal. La suprastanza communala è da l’avis, che la structura actuala saja la pli adattada per Surses. Tranter auter argumentescha ella cun dapli lavur administrativa cun in parlament communal, plinavant saja magari grev da recrutar avunda parlamentarias e parlamentaris.
Dretg da referendum
La nova constituziun communala prevesa plinavant d’installar il referendum facultativ. Quai vul dir, che decisiuns da la radunanza communala ston vegnir suttamessas a la votaziun a l’urna, sche 80 votant/as pretendan il referendum encunter la decisiun. Da l’autra vart duess la cumpetenza finanziala da la radunanza communala vegnir augmentada.
Radunanza d’orientaziun
Da nov duess vegnir fixà en la constituziun communala, che la suprastanza communala saja obligada d’organisar radunanzas d’orientaziun davart projects e fatschentas da muntada speziala, sche almain 50 votantas e votants pretendan quai cun ina dumonda en scrit.
Vinavant model da direcziun
Suenter avair examinà ils avantatgs e dischavantatgs dals dus models da direcziun «direcziun communala» e «CEO» vegn la suprastanza communala a la conclusiun ch’il model da direcziun pratitgà fin ussa saja sa cumprovà, e quel model saja il pli adequat per la vischnanca da Surses. La revisiun parziala da la constituziun communala da Surses va a l’urna ils 18 da zercladur.
Dapli paja per ils uffizials
La lescha d'indemnisaziun è en vigur suenter la fusiun da Surses. Ussa vegn ella adattada cun avair las experientschas dals davos set onns. En il messadi per la radunanza communala da glindesdi, scriva la vischnanca ch'ins haja ils davos onns investì considerablamain dapli temp che previs. En vista a las elecziuns communalas ordinarias dals 20 d'avust e la demissiun dal president communal per la fin da la perioda d'uffizi saja quai il dretg mument per preschentar la revisiun.
Far pli attractiv
La finamira principala da la revisiun saja da far uschè attractiva sco pussaivel ina candidatura, saja quai per il presidi communal, dentant er per la suprastanza communala ed autras funcziuns politicas. Las persunas che s'engaschan duessan avair in'indemnisaziun che correspunda a las obligaziuns ed il temp investì. Per il presidi communal munta quai ina paja annuala da 155'870 francs per in pensum da 100%. L'indemnisaziun per persunas da la suprastanza fiss 24'950 francs cun in pensum da 20%. Plinavant duess per il cas che la presidenta u il president communal na vegn betg reelegids vegnir fatg ina segiranza tar la Thurgauer Bürgschaftsgenossenschaft. La premia è in pertschient da la summa salariala – mintgamai la mesadad pajass la vischnanca e la persuna en carica.
Approvà credit supplementar per punt
Per renovar la Punt Mulegn a Parsonz ha la radunanza communala approvà in credit supplementar da 560’000 francs. La punt che collia Salouf cun Parsonz vegn duvrada surtut dals purs e da velocipedists e viandants. Perquai che las cundiziuns sajan sa midadas suenter il 2021 ins saja vegnì tar la conclusiun, ch’ils 800’000 francs budgetads na tanschan betg per la renovaziun da la pund ch’è circa 50 onns veglia.
Ina candidatura per suprastanza
Per las elecziuns communalas dals 20 d’avust datti gia ina candidatura. Adrian Ballat, il parsura dal departament da turissem ha ditg sut varia a la radunanza communala da glindesdi saira, ch’el stettia a disposiziun per in’ulteriura perioda d’uffizi. Per il presidi communal na datti anc naginas candidaturas uffizialas, ha confermà il president communal Leo Thomann. Il termin per inoltrar ina candidatura è ils 20 da fanadur.