In emprim obstachel ha l'hotel Cube gia piglià il favrer passà. Cun 282 «gea» e 5 ha la radunanza communala da Surses approvà cler il credit d‘impegn da 8,9 milliuns francs per cumprar l'hotel Cube a Savognin – cumprais il bajetg daspera cun l’affar da sport. Inclus en questa summa totala èn il terren sco era las lavurs da renovar e mobigliar da nov l'hotel. I manca dentant anc la decisiun a l'urna – che suonda questa dumengia.
Pliras provas da reactivar il Cube
Actualmain è il Cube en possess da l‘interprendider austriac Rudolf Tucek. El era vegnì avert il december 2005. L'atun 2018 era quel vegnì serrà per l'emprima giada pervi da daivets ed ina dispita giuridica cun las pendicularas. L'entschatta schaner 2020 è'l puspè vegnÌ avert sco hotel da garni e vegnì serrà definitivamain il 2022. Plirs onns è la vischnanca stada a la tschertga d'ina soluziun. E tut tenor il resultat a l'urna pudess el bainbaud puspè giugar ina rolla en la cuntrada turistica regiunala.
Rudolf Tucek è dapi la fin dals onns 1970 activ en la branscha da turissem. El ha gì ed ha divers posts en firmas ed organisaziuns turisticas da l'Austria, p. ex. è el stà CEO e directur da la Vienna International Hotelmanagement AG cun manaschis d'hotellaria en differents pajais.
Tenor atgnas indicaziuns è el dapi il 2004 sviluppader dal concept da Cube. Quai èn hotels sco quel a Savognin cun ina purschida e structura innovativa ed attractiva cunzunt per in public giuven (sco p. ex. cun ina paraid da raiver u ina zona da gieus e divertiment entaifer l'hotel).
Adina puspè pon ins però era leger en artitgels da differentas opiniuns u dispitas enturn el e ses posts. Per exempel hai dà lingias grassas en connex cun daivets, dispitas, pajas da persunal betg pajadas u era differenzas cun las pendicularas.
Plan concret per bajetgs e manaschi
Cun la cumpra da l'hotel quinta la vischnanca da Surses da pudair dar nova vita a quel grazia a 282 novs letgs. En il bajetg daspera duai dar ina plazza per in affar da sport e chombras da persunal. Quai aveva la suprastanza decis il schaner en collavuraziun cun la Pendicularas Savognin SA e la Turissem Val Surses Savognin Bivio SA.
Uniun Albierts da giuventetgna duai surpigliar il manaschi
La vischnanca na vul betg manar sezza il hotel, mabain surdar il manaschi a l'uniun Albierts da giuventetgna svizzers. Lezza era gia avant l'avertura dal Cube il 2005 interessada vid in local per in albiert da giuventetgna a Savognin. Il contract prevesa ina giada ina durada da 10 onns. Sco recumpensa paja la vischnanca ina contribuziun da manaschi che duai cuvrir las expensas administrativas. Era las investiziuns ed amortisaziuns restan tar la vischnanca.
Era per bajetg daspera datti locataris interessads
Il bajetg sper il hotel vul la vischnanca surdar ad in locatari extern. Tenor il messadi da votaziun sajan interessents gia s'annunziads. Uschia duai l’infrastructura sin l’areal Lecsch vegnir mantegnida e l’attractivitad turistica vegnir augmentada.
Calculaziuns paran d'empermetter cifras nairas
Gratuit n'è nagut, uschia che la vischnanca quinta cun il pretsch da cumpra da 5 milliuns francs ed ulteriurs 3,7 milliuns francs per mantegniment ed investiziuns. Ensemen cun ina reserva da 0,2 milliuns francs dumonda la vischnanca pia in credit d'emprest da total 8,9 milliuns francs.
En la fasa iniziala quinta la vischnanca bain anc cun in deficit da radund 265'000 francs. Ina giada che las amortisaziuns èn fatgas, vesa la vischnanca in surpli d'entradas dal manaschi da l'albiert da giuventetgna e dal locatari en il bajetg daspera. Quai tut tenor scenari ed occupaziun Tenor il messadi quinta la vischnanca lura cun cifras nairas, uscheditg che l'albiert è occupà per 27,3% (20'000 pernottaziuns).
Il temp tenta – perquai l'urari stretg
Tenor il messadi da votaziun è il plan da termins fitg stretg, perquai che la transacziun è pussaivla mo enfin la fin da mars. Quai pervi da la vendidra che ristga uschiglio dad ir concurs:
- Vegn la fatschenta approvada ils 29 da mars 2026 a l'urna, suttascriva la vischnanca avant la fin da mars ils contracts.
- L'entschatta december duai l'hotel Cube puspè avrir sias portas.
Istorgia cun plirs craps da stgarpitsch
Perquai ch'il possessur Rudolf Tucek n'ha sur onns betg organisà radunanzas generalas per s'occupar cun ils problems da l'hotel, ha la finala era la dretgira regiunala d'Albula/Alvra stuì intervegnir. La dretgira aveva pretendì che la societad d'aczias da l'hotel resolvia divers puncts – uschiglio spetgia la liquidaziun. Las mesiras spetgadas sajan vegnidas liquidadas, aveva l'anteriur president da la dretgira regiunala Alvra ditg sin dumonda da RTR.
