La suprastanza communala da Surses ha decis da far ina fossa cuminaivla sin mintga santeri en il territori communal. Otg da quellas fossas èn anc da realisar, numnadamain a Tinizong, Rona, Mulegns, Sur, Murmarera, Beiva (catolic e refurmà) ed a Savognin nua ch’i duess dar in nov lieu.
Sin ils santeris da Savognin, Cunter, Salouf, Riom e Parsonz existan gia fossas cuminaivlas. Ils custs per fossa communabla vegnan stimads tut tenor il lieu sin 4'000 fin 6'000 francs. Las fossas duain esser sche pussaivel sin ina surfatscha verda e vegnir equipadas cun in simpel monument (p.ex. crap commemorativ cun ina crusch), sin il qual ins po er agiuntar il num da la defuncta u dal defunct sin giavisch.
Sur e Tinizong vegn realisà anc quest onn
Il plan da termins prevesa ch'i vegnan realisadas sper Salouf duas ulteriuras fossas cuminaivlas l'onn 2025. Sur e Tinizong sajan idealas, perquai ch'i na stoppia vegnir abolì là naginas fossas existentas, è vegnì infurmà ad ina saira d’infurmaziun a Bivio il mardi saira.
-
Bild 1 von 2. En colur verda èsi pussaivel da vesair nua che la fossa communabla fiss previsa a Sur. Bildquelle: Surses.
-
Bild 2 von 2. Tar la baselgia da Son Martegn a Savognin per exempel èsi previs da far las fossas communablas novas en il sectur en colur verda. Bildquelle: Surses.
Ils onns 2026 e 2027 duain vegnir realisadas las sis ulteriuras fossas cuminaivlas a Rona, Mulegns, Murmarera, Beiva (catolic e refurmà) sco er a Savognin (nov lieu).
Consultaziun publica
Ideas e giavischs per midadas en connex cun la realisaziun èn bainvegnids tar la vischnanca da Surses e pon vegnir consultads fin il pli tard ils 7 d'avust 2025 en scrit u per e-mail a la vischnanca sin canzleia@surses.ch