Sco quai che Leo Thomann, il president communal ha ditg, na veglia la vischnanca betg midar la radunanza communala en tudestg, era sche quai saja gia vegnì giavischà pliras giadas. Betg realistic saja da far translaziuns simultanas dal rumantsch en tudestg. L’idea saja ina giada stada sin maisa, ma ins n’haja alura ord raschuns praticas desistì da l’idea.
Betg simpel da chattar rumantschAs
Chattar persunal rumantsch saja adina ina gronda sfida. Uschia ins haja occupà la plazza da l’assistent dal chanzlist cun ina persuna da lingua tudestga, perquai ch’ins n’haja chattà nagina rumantscha u rumantsch.
Pagina d'internet cun potenzial
Potenzial per meglieraments datti sin la pagina d’internet da la vischnanca da Surses. Uschia n’èsi per exempel betg pussaivel d’inoltrar ina dumonda da bajegiar en rumantsch.