Differentas reacziuns criticas èn entradas tar la vischnanca da Surses ch’ha decidì da betg pli vender tschareschas questa stad. Questa decisiun ha differentas raschuns di Martegn Netzer, il manader dal servetsch tecnic da la vischnanca Surses:
I deva fitg blera lavur, igl era da prender si las empustaziuns, ins saveva pir in di avant cura che las tschareschas vegnan, e quel mument ch’i arrivan èsi da telefonar a tut quels ch’han empustà, e sche quels n'èn betg stads cuntanschibels alura è quai fitg stentus, cun quai ch’i na dat betg in salv sfradentà.
In auter motiv da betg pli vender tschareschas quest onn è ch’ins na veglia betg concurrenzar las butias indigenas. Tar il Volg per exempel beneventan ins la decisiun, ha ditg Conrad Platz, il manader da fatschenta dal Volg Savognin e conturn.
Enfin l’onn 2005 vegniva la vendita da tschareschas anc subvenziunada da l’uffizi federal d’agricultura, quai sin dumonda da l’uniun da pumicultura Svizra.
RR actualitad 08:00