Sco quai che Karin Hersche ha ditg envers RTR, enclegia ella rumantsch, na discurria però betg rumantsch: «Jau vegn a m’exprimer en tudestg, quai vegn a funcziunar bain». Sin la dumonda sch’ella na veglia betg far in curs intensiv da rumantsch ha ella ditg, ch’ella saja in’aderenta da la bilinguitad, ed il pli impurtant saja da reunir las differentas gruppaziuns, la lingua duess esser secundara.
«Il rumantsch na vegn betg sut las rodas»
Gian Sonder da Salouf è persvadì ch’i vegnia a dar ina soluziun che cuntenta tuts: «Nus empruvain franc da cuntentar era quels che n’èn betg da lingua rumantscha, per exempel pudessan nus offrir scolaziun da rumantsch u da motivar l’in u l’auter da sa participar ed empruvar da s’adattar, jau na crai betg ch’il rumantsch vegnia sut las rodas cun la fusiun», ha ditg il president da la suprastanza transitorica da la vischnanca Surses e nov elegì commember da la suprastanza communala da la vischnanca Surses.
«Betg mo il rumantsch è impurtant»
Giancarlo Torriani da Beiva ch’è vegnì elegì en la suprastanza communala manegia: «Rumantsch è impurtant, ma impurtant per nus è era da mantegnair il talian». A Beiva ins saja creschì si triling, ed ins duess mantegnair era en il futur la multiculturalitad. La glieud haja plaschair vi dal las differentas linguas, uschia il hotelier da Beiva.
8.8 milliuns dal chantun
La nova vischnanca Surses cumpiglia las nov vischnancas Beiva, Marmorera, Sur, Mulegns, Tinizong-Rona, Savognin, Cunter, Riom-Parsonz e Salouf. Ella va en vigur l'emprim da schaner 2016. Il chantun sa participescha cun 8.8 milliuns francs vi da la fusiun. La vischnanca vegn a dumbrar radund 2'400 abitantas ed abitants. L'administraziun communala sa chatta a Tinizong.