Siglir tar il cuntegn

Header

Navigaziun

Legenda: Tadlar il audio Mezdi: Schlargiament da Parc Ela na plascha betg a pendicularas. Durada 03:37 minutas.
03:37 min, Actualitad dals 20.05.2019.
cuntegn

Surses Parc Ela fa quitads a las pendicularas

Las Pendicularas da Savognin teman, che l'entir territori da skis daventia il 2022 ina part dal Parc Ela. L’auter onn ston las vischnancas en il Parc Ela decider, sch’ellas vulan sa participar al parc natiral.

En il Surses decida da nov la vischnanca fusiunada davart ina participaziun al Par Ela. Quai muntass, che l’entir territori da skis daventass ina part dal parc. Riom-Parsonz aveva anc il 2010 ditg NA al parc.

Pendicularas teman restricziuns

Leo Jeker, commember dal cussegl d’administraziun da las Pendicularas da Savognin SA ha ditg envers RTR, ch’el temia restricziuns per investiziuns futuras en il territori da skis da Savognin. Radund 90% dal territori da skis da Savognin sa chatta sin il territori da Riom-Parsonz, che n’è il mument betg en il Parc Ela. Da nov decida uss la vischnanca fusiunada davart la participaziun vi dal parc. Tar in GEA daventass l’entir territori da Surses part dal parc natiral, e cun quai era Riom e Parsonz.

Parc Ela na vesa nagin problem

Paulo Giacometti, il president dal Parc Ela.
Legenda: Paulo Giacometti, il president dal Parc Ela. RTR, Federico Belotti

Paulo Giacometti, il president dal parc Ela ha ditg, ch’ins na stoppia temair nagut: Era en il Parc Ela valian las medemas leschas – en il parc na dettia quai naginas restricziuns da bajegiar.

Marco Fasciati, il manader da fatschenta dals Runals da Beiva SA ha ditg envers RTR, ch’els n’hajan enfin oz gì nagin problem cun esser en il Parc Ela. Uschia hajan ins pudì realisar in indriz dad ennevar en il parc natiral. Quel n’haja impedì nagut.

La vischnanca da Surses n’ha betg anc tractà la dumonda dal schlargiament dal perimeter dal Parc Ela. Leo Thomann il president communal ha dentant ditg, ch’el haja gia udì da temas ch’i dettia en connex cun investiziuns futuras.

RR actualitad 11:00