Il comité «Na al contract dal parc» è da l’opiniun, che cun dir Na a la votaziun dals 21 da favrer a l’urna, vegnia fatga la basa per las tractativas ch’il territori da skis possia vegnir piglià or dal perimeter dal parc natiral. Il comité tema da restricziuns sch’i va per investiziuns futuras en il parc. Fatg è, che la vischnanca da Surses ha gia empruvà ensemen cun la regenza grischuna, d’excluder il territori da skis dal Parc Ela.
BAFU n’accepta betg in Parc Ela senza territori da skis
En ina brev ch'è avant maun tar RTR scriva la vicedirectura da l’Uffizi federal d’ambient BAFU Franziska Vivica Schwarz al cusseglier guvernativ Jon Domenic Parolini, ch’i na saja betg pussaivel, d’excluder il territori da skis dal parc. Cun excluder il territori da skis mancass in’impurtanta part en il parc. Era la proposta da la vischnanca da Surses da trair il cunfin lung dad auals na saja betg raschunaivla.
Plinavant dettia en Svizra er auters parcs da natira regiunals cun territori da skis e quai en la grondezza sco Savognin. Là na dettia nagins problems da renovar ovras e purtar sin il stan actual la tecnica, uschia il BAFU.
Ordinaziun dals parcs sto vegnir acceptada
Sin dumonda da RTR scriva l’Uffizi federal d’ambient: Il BAFU sa basa en sias cussegliaziuns e decisiuns sin las pretaisas legalas. La politica da parcs sa basia sin la strategia da labels. Vischnancas che adempleschian las pretensiuns possian decider voluntari e democratic, sch’ellas veglian sa participar vi dal parc u betg.
Vischnancas che veglian participar al parc s'obligheschian d’ademplir a lunga vista las pretensiuns formuladas en la charta dal parc. Mintga vischnanca saja libra, da sa decider per u cunter il parc.
Tge sa la vischnanca da Surses propi far?
Avess il Surses da dir Na al Parc Ela ils 21 da favrer, alura vala questa decisiun. Sco quai che l’Uffizi federal d’ambient scriva sin dumonda da RTR, avess la vischnanca mo pli la pussaivladad d’ir la via legala. Quai vul dir: Per discussiuns sur dal perimeter dal parc fissi memia tard: La vischnanca da Surses stuess cumbatter cunter il BAFU davant il Tribunal administrativ federal.
Quai na vegn però betg ad esser il cas perquai che sch’i dat in Na da Surses per il Parc Ela, lura è quai ina decisiun democratica, cunter quella che la vischnanca da Surses vegn betga recurrer. Envers RTR ha il president communal Leo Thomann ditg, ch’ins n'haja betg anc decidì co agir, sch’i avess da dar in Na al Parc Ela. La suprastanza communala da Surses recumonda dal reminent da dir Gea al contract dal Parc Ela. Fatg è er: Las autoritads da las sis vischnancas èn sa cunvegnidas, suenter la resposta negativa da l'uffizi federal dal matg 2020, da suttametter a las radunanzas communalas il perimeter inclusiv l'entir territori da la vischnanca Surses.
Parc Ela po cuntinuar
L’avegnir per il Parc Ela è gia garantì e quai independent, sch’i dat in Gea u in Na da Surses: Bravuogn-Filisur, Albula/Alvra, Ferrera/Schmitten, Lantsch e Tavau han gia approvà la prolungaziun dal contract dal Parc Ela per ils onns 2022-2031. Surses è la suletta vischnanca che sto anc votar sur dal contract dal Parc Ela.