Sco quai che la directura da Savognin Bivio Alvra Turissem Tanja Amacher di, è'la cuntenta cun il dumber da resuns. Quai malgrà ch’ins haja tramess dapli che 3'000 brevs. Impurtant saja surtut che la glieud saja ussa conscienta da la problematica. I dettia regularmain novas offertas per dar a fit ina chombra u in’abitaziun.
Situaziun è sa meglierada
En il fratemp para la situaziun d'esser sa meglierada, sco quai che dus exempels mussan. Il hotel Arlos ed il Danilo a Savognin han chattà per tut il persunal in suttetg. Tranter auter hajan sis persunas chattà ina dimora en il Hotel Pianta ch’è il mument serrà. Dus ulteriurs emploiads hajan chattà in'abitaziun. A Savognin saja quai però adina ina gronda sfida da chattar in’abitaziun, di la hoteliera Cornelia Diaz Gonzales-Demarmels.
Beiva è cuntent
Cuntent sajan ins er a Beiva. Il mument na saja nagin vid tschertgar in’abitaziun, di la hoteliera Martina Lanz. Els hajan però era ina chasa da persunal che porschia plaz a 15 persunas. Tenor ella stuess quai era esser la regla ch’in hotel haja era avunda plaz per il persunal. Bajegiar in hotel nov senza chombras per persunal, quai n’avess gnanc d’esser lubì, di ella.
Nagins Quadrins suenter recurs
Per il mument nagin tema è d'installar Quadrins tar l’anteriura staziun da la pendiculara veglia a Savognin. Sco quai ch’il president communal Leo Thomann ha ditg, haja dà in recurs. En quel vegniva renfatschà che la lescha da bajegiar na vegnia betg resguardada a moda correcta. Sin quai hajan las Pendicularas da Savognin retratg la dumonda da bajegiar. Tenor la lescha da bajegiar da Savognin è spazi d’abitadi en quest lieu reservà per persunal da las pendicularas. En il project fiss dentant stà previs da dar a fit las abitaziuns era ad autras branschas.