Siglir tar il cuntegn

Header

audio
Emprim president communal da Surses va en pensiun
Or da Actualitad dals 27.12.2023. Maletg: RTR
laschar ir. Durada: 4 minutas 22 Secundas.
cuntegn

Surses President communal va en pensiun

L’emprim president communal da la vischnanca fusiunada da Surses va en pensiun la fin da l’onn. Il presidi dettia el giu cun in egl riend, ed in bragint, ha el ditg envers RTR.

I sajan stad interessants otg onns, ch’el haja pudì timunar la vischnanca da Surses. Igl haja dà blers bels muments, di Leo Thomann. Sin l’auter maun saja il squitsch sin il president adina creschì dapli ils davos onns, i dovria buna gnerva ed ina pel dira. Or da questa vista saja bel da pudair dar en mauns pli giuvens il presidi.

Il davos ch’haja fatg grond plaschair saja stà quest mais, nua ch’il pievel haja decidì da bajegiar ina nova scola. Dà da pensar haja dentant la decisiun, cura ch’il suveran n'haja betg dà a l'urna in credit supplementar per l’ustaria nova a La Nars. Era la decisiun da returnar tar il surmiran en scola, saja ina trumpada per el.

Sco positiv valitescha Thomann la situaziun finanziala da la vischnanca. Quai saja franc d’attribuir a bunas entradas da taglia ed era a la summa da passa 8 milliuns francs ch’igl haja dà per la fusiun. Ils divers uffizis ch’el haja anc il mument veglia el ussa dar giu. Durant ses temp liber vul el ussa far dapli turas da skis u era ir sin pista, ina gronda muntada hajan per el era ils chauns da tschertga.

RTR actualitad 12:00

Artitgels legids il pli savens