Siglir tar il cuntegn

Header

Navigaziun

cuntegn

Surses Savognin dovra novs parcadis ed in nov lavuratori

En l’anteriura staziun da val da Savognin – Malmigiucr – Radons vul la vischnanca da Surses bajegiar in lavuratori communal. E sin il terren dasperas duai dar novs parcadis. Ils 27 da matg decida la radunanza communala da Surses davart ina cumpra dal bajetg e dal terren.

La radunanza communala da Surses decida oz glindesdi, sch’ella vul cumprar da las pendicularas da Savognin il bajetg da la staziun da val da l’anteriura pendiculara Savognin – Malmigiucr – Radons. Vitiers vegn ina cumpra da radund 10'000 meters quadrat en il conturn tranter la staziun da val e Davos Fallung. Il pretsch da cumpra per il terren ed il bajetg munta a 975’000 francs.

Tenor il messadi saja il contract da cumpra sin giavisch da las pendicularas gia vegnì suttascrit, cun la resalva da l'approvaziun da la radunanza communala e da la lubientscha da l'inspecturat dal register funsil e dal register da commerzi. Da resguardar datti era il dretg da precumpra dals purs per il terren agricul: Uschia è la parcella 3220 Ferbra cun ina surfatscha da 6'907 meters quadrat il mument scritta ora en il fegl uffizial per in pretsch da 4'610 francs.

Las parcellas en ils quadrats vulan las Pendicularas da Savognin vender a la vischnanca Surses.
Legenda: Las parcellas en ils quadrats vulan las Pendicularas da Savognin vender a la vischnanca Surses. Geogr

Concept da parcar

Sin il terren davant la deponia da rument a Davos Fallung prevesa la suprastanza d’eriger in parcadi da pliras auzadas. Tenor il messadi da la vischnanca Surses datti a Savognin memia paucs parcadis. Sch’ils projects da hotel a Grava e Viols ed il resort da vacanzas Viols vegnissan realisads, vegniss tenor la vischnanca da Surses quella problematica anc engrevgiada. Perquai è la suprastanza vidlonder da laschar elavurar in concept da parcadis. Il lieu en il conturn da Davos Fallung saja optimal, causa la sia vischinanza al center da vischnanca a Grava e la staziun da las pendicularas a Lecsch.

Nov concept da parcar

Il bajetg da l’anteriura staziun da val che vegn il mument duvrà da las pendicularas sco deposit da material, vul la vischnanca da Surses duvrar sco lavuratori communal. Cun quai pudess vegnir schlià il lavuratori actual ch’è integrà en il bajetg da la scola Grava.

RR actualitad 07:00