Surses survegn ina senda tematica

Sin la via da viandar existenta da Somtgant a Radons vegnan installadas quest onn 14 tavlas d’infurmaziun ch’infurmeschan davart la vita sin l’alp. Igl èn planisadas differentas interacziuns. Il project «Alpleben Somtgant Radons» custa radund in mez milliun francs.

La nova plazza da giugar sin l'Alp Somtgant. Bild in Lightbox öffnen.

Legenda da maletgs: Uschia vegn la nova plazza da giugar sin l'Alp Somtgant a vesair ora. mad

La senda tematica, che Savognin Turissem realisescha sin l’Alp Somtgant, cumenza dasper la staziun da muntogna da la pendiculara. Là vegn realisà ina nova plazza da giugar.

Lung da la senda da viandar vegnan installadas differentas interacziuns. Uschia pon ils uffants per exempel emprender a mulscher cun in’attrappa tar in bigl, en in auter lieu pon ils uffants raiver sin in crap en furma d’ina serp, e tar in’autra staziun datti in spievel lung per tschertgar animals en il liber.

L'entrada da la senda da viandar. Avrir maletg en lightbox.

Legenda da maletgs: L'entrada da la senda da viandar. mad

Avertura gia la stad

Sco quai che la directura da Savognin Turissem Tanja Amacher ha ditg, duai la mesadad dal project esser realisà enfin il mez da fanadur. Fin la fin da l’onn duain tut las 14 staziuns sin la senda da viandar esser realisadas. L’entschatta da matg vegnan las lavurs scrittas ora, la vischnanca da Surses vul surdar las lavurs a firmas indigenas sche pussaivel.

La senda tematica duai mussar sin ina moda termaglianta las atgnadads da la vita sin l’alp, ha ditg la directura da turissem. La gronda part dals custs surpiglia Savognin Turissem or da reservas, la vischnanca da Surses ed il chantun che paja radund 100’000 francs. Vi dal project sa participeschan era il Parc Ela e la corporaziun d’alp.

Novas en il guaud da lareschs

In segund project datti en il guaud dals lareschs a Savognin tar la plazza da giugar. Enfin la stad vegn endrizzada ina senda da guaud per uffants. Ella è 300 meters lunga. Lung da la senda vegnan messas sculpturas da laina, tranter auter in stgilat, in tschierv, ina lieur, in pitgalain, ina capriola, ina vulp e bulieus. Sin la senda vegn era installada ina chasetta da giugar e raiver per uffants.

RR novitads 06:00