Siglir tar il cuntegn

Header

video
Las vischnancas gidan las pendicularas
Or da Telesguard dals 30.05.2018.
laschar ir. Durada: 3 minutas 38 Secundas.
cuntegn

Grischun Central Surses sustegna nova pendiculara cun 2 milliuns

Cun 138 tar 3 vuschs ha la radunanza communala approvà in emprest senza tschains da dus milliuns francs per las Pendicularas da Savognin SA. Quellas vulan remplazzar l’auter onn la sutgera da Savognin a Tigignas da l'onn 1987. La nova pendiculara è budgetada cun diesch milliuns francs.

Las Pendicularas da Savognin SA vulan finanziar 40% cun chapital agen. Ina part da quel chapital agen è lià vi d’ina participaziun dal resort da vacanzas Surses Alpin a Savognin. Quellas aczias duain perquai vegnir cumpradas da la vischnanca per maximalmain dus milliuns francs. Perquai che quels meds finanzials èn necessaris ad uras, dat la vischnanca in credit temporar senza tschains da dus milliuns francs a las pendicularas, enfin che la vischnanca ha cumprà las aczias dal Surses Alpin ch’èn il mument en possess da las pendicularas.

audio
Bunura: Reacziuns sin credit per pendiculara nova a Savognin
ord Actualitad dals 30.05.2018.
laschar ir. Durada: 3 minutas 7 Secundas.

Emprima badigliada gia la primavaira proxima

Sche tut va tenor plan, entschaivan las lavurs da construcziun l’auter onn. En funcziun duess il nov implant ir sin la stagiun d’enviern 2019/20. Avess il project da far naufragi, vala la concessiun per la sutgera actuala anc enfin il schaner 2024 – i duvrass dentant anc revisiuns en la valur dad in milliun francs.

Cumpra da terren e bajetgs militars

La radunanza communala ha plinavant approvà il contract da cumpra per terren e bajetgs militars da la Confederaziun svizra sin territori communal a Beiva. Tar ils bajetgs sa tracti da l’implant da protecziun a Tua Sura, d’ina chamona sin l’alp Set, e da la chamona d’alp Grevasalvas. Per la cumpra da tuts bains funsils e bajetgs è vegnì fixada la summa da 100’000 francs.

Naginas subvenziun pli per la cassa da malsauns

La radunanza communala ha annullà ina decisiun dal 2003 da l’anteriura vischnanca da Murmorera, che sustegneva ils abitants cun ina premia per la cassa da malsauns da 300 francs per creschi e 75 francs per uffant. La suprastanza communala da Surses è stada da l’opiniun dad abolir quellas contribuziuns, per tractar tuts medem en la nova vischnanca. Il favrer 2017 aveva la suprastanza communala decidì, da betg pli pajar contribuziuns per la cassa da malsauns per ils abitants da Murmarera retroactiv sin l’emprim da schaner 2016. Cunter questa decisiun aveva in abitant da Murmarera cun success fatg recurs tar la dretgira administrativa Grischuna. Sin basa da quest recurs survegnan ils abitants ussa tuttina las subvenziuns per las premias da la cassa da malsauns per ils onns 2016 e 2017.

Credit supplementar per sanaziun serenera Beiva

La sanaziun da la serenera da Beiva custa radund 2,5 milliuns francs. Ils custs calculads èn 400’000 francs pli auts che budgetà oriundamain. La radunanza communala ha approvà il credit supplementar. La sanaziun da la serenera a Beiva è necessaria ed era gia vegnida approvada la fin da l’onn 2015 da l’anteriura vischnanca da Beiva. Las lavurs da construcziun duain cumenzar anc quest onn.

Iniziativa nunvalaivla

Las votantas ed ils votants da Surses èn vegnids infurmads, che l’iniziativa che pretendeva da sistir in credit dad 1,3 milliuns francs per il center da passlung a Rona, è nunvalaivla. L’iniziativa na correspundia betg a las pretensiuns d’iniziativa. Quai vul dir, l’iniziativa na vuleva betg mo abolir il credit, ma duvrar ils daners en in auter lieu. Quai na correspundia betg a l’uschenumnada unitad da la materia.

RR novitads 06:00

Artitgels legids il pli savens