Siglir tar il cuntegn

Header

cuntegn

Surses Tribunal federal fraina ressort Viols

Il Tribunal federal ha approvà in recurs da la fundaziun Helvetia Nostra en connex cun il ressort da vacanzas Viols, planisà en il Surses. La chaussa va cun quai enavos tar la Dretgira administrativa dal Grischun.

La Dretgira administrativa sto tranter auter anc ina giada examinar, sch'il project avess stuì vegnir publitgà er en il Fegl uffizial dal Grischun. Quai che n'è fin uss betg stà il cas.

Il project Viols

Avrir la box Serrar la box

Il project cumpiglia 80 abitaziuns en sis bajetgs ed ina tur. Ils 9 d'avust 2019 era il project cumparì en il Fegl uffizial communal ed è vegnì publitgà per invista. La lubientscha è suandada la fin october dal medem onn.

Ultra da quai ha il Tribunal federal decidì che la dretgira grischuna haja violà il dretg d'udida giuridica da Helvetia Nostra. Quai cun betg tractar il fatg, che la vischnanca Surses aveva refusà a la fundaziun l'invista en las actas da bajegiar.

Visualisaziun dal project Viols a Savognin.
Legenda: Visualisaziun dal ressort Viols a Savognin. Baulink

Invista en las actas

Suenter che la vischnanca da Surses aveva dà l'october 2019 la lubientscha per il project, ha Helvetia Nostra dumandà il december per invista en ils documents. Plinavant ha ella insistì ch'il project avess gì da vegnir publitgà er en il Fegl uffizial chantunal. Cura che Helvetia Nostra ha inoltrà in recurs cunter il project, n'è la vischnanca da Surses betg entrada sin quel. Er l'invista als documents n'ha la vischnanca betg dà. Il recurs inoltrà ha lura er la dretgira chantunala refusà.

Revocà decisiun da Dretgira administrativa

Cun decider ch'il dretg d'udida giuridica da Helvetia Nostra è vegnì violà, è la decisiun da la dretgira chantunala gia revocada. Davart la dumonda da bajegiar en il Fegl uffizial federal, ha il Tribunal federal er prendì posiziun: La Dretgira administrativa dal chantun stoppia examinar sch'il project saja collià cun in'incumbensa federala. Lura avess la dumonda stuì esser publitgada en il Fegl uffizial chantunal. Ina tala incumbensa datti per exempel sche la lescha federala davart la protecziun da la natira e da la patria vegn en acziun. Questa lescha ha per consequenza che fundaziuns svizras, sco Helveta Nostra, pon far diever dal dretg da recurs dad associaziuns.

Per che talas organisaziun pon realisar lur lavur, prevesa la lescha federala explicitamain che tals projects ston vegnir publitgads en il Fegl uffizial chantunal u federal. Be uschia possia in'organisaziun avair ina survista da projects planisads e s'infurmar.

Dumonda decisiva

Decisiva en quest connex è la dumonda da l'incumbensa federala. Tenor la lescha d'abitaziuns secundaras, ha la publicaziun da dumondas da bajegiar e la communicaziun da talas lubientschas, da capitar tenor perscripziuns chantunalas, scriva il Tribunal federal. Sche la lescha d'abitaziuns secundaras è pia decisiva en quest cas, fiss la publicaziun dal Surses stada correcta.

RTR novitads 12:00

Artitgels legids il pli savens

Scrollar a sanestra Scrollar a dretga