Siglir tar il cuntegn

Header

cuntegn

Surses Vischnanca vul limitar l’access da schlieusas a motor

La vischnanca da Surses ha publitgà il sboz da la lescha per charrar sin vias da prada, funs, guaud ed alps cun vehichels a motor. Quella prevesa tranter auter restricziuns pli severas ch’oz. Blers possessurs da schlieusas a motor pudessan perder la lubientscha da charrar.

L’artitgel nov da questa lescha prevesa, da betg pli lubir schlieusas a motor, quad-tracs e vehichels sumegliants. Lubientschas duessi mo pli dar per cas excepziunals, per exempel per persunas che abitan l’entir onn là nua ch’i dovran in access cun ina schlieusa a motor – u per viadis uffizials da taxi sin tscherts trajects u per hotels ed ustarias.

Blers pudessan perder la lubientscha da charrar

In problem daventa quai surtut a Radons en il territori da skis da Savognin, nua che blers han aclas ed ina schlieusa a motor. Blers possessurs da tals vehichels pudessan perder la lubientscha da charrar sin la naiv. In dad els è Curdegn Mareischen: «Normalmain vegn jau cun las pels a Radons u cun il runal suren sur las Martegnas, ma cura che jau vegn a Radons cun la dunna ch’è in pau malsauna, sun jau led sche nus pudain ir cun la schlieusa a motor a Radons».

El è da l’avis che la vischnanca avess da vegnir cun ina buna alternativa per quels che na pon forsa betg pli charrar cun la schlieusa a motor.

Garascha avess pli pauca lavur

Consequenzas avess il scumond da charrar per schlieusas a motor era per la garascha Bruseghini a Savognin. «Per nus èn ils mantegniments da las schlieusas a motor daventads fitg impurtants e cun quai che nus pudain far quels durant l’entira stad pudain nus far quellas lavurs cura ch’i marscha pli pauc cun ils autos», di il manader da fatschenta Tiziano Bruseghini.

Pendicularas pretendan dapli controllas

Las Pendicularas da Savognin èn neutralas envers la lescha. Sin dumonda scriva il directur Christoph Passecker, ch'i saja tenor la lescha da pendicularas betg lubì che schlieusas a motor privatas curseschian sin las pistas durant las uras d’avertura. Per il traject Tigignas – Radons munta quai pia, che l’enviern na po betg vegnir charrà tranter las 09:00 e las 16:30. Passecker beneventass, sche la vischnanca controllas dapli. I dettia numnadamain adina puspè situaziuns privlusas cun schlieusas a motor, perquai che las reglas na vegnian betg resguardadas.

Scumond da charrar durant il di na vegn betg respectà

Quest fatg conferma era Leo Thomann, il president communal da Surses: «L’experientscha dals davos onns ha mussà ch’igl è in fitg grond travasch sin la pista Val Nandro, uschia ch’igl è mo ina dumonda dal temp enfin ch’i capita in accident». Blers sa tegnian betg vi da las uras da charrar lubidas. La suprastanza haja schon ponderà sch’i na dessi betg autras pussaivladads, ma ella saja vegnida tar la conclusiun, che mo zavrar il travasch da skis, schlieusas a motor e peduns, dals vehichels a motor, fissi ina buna schliaziun. Ma quai n’è ussa nagina tema, sco ch’il scumond da charrar previs per schlieusas a motor en la lescha mussa.

audio
Radons: Scumond da charrar cun schlieusa a motor
ord Actualitad dals 21.06.2021.
laschar ir. Durada: 3 minutas 44 Secundas.

Radunanza communala infurmescha

Avrir la box Serrar la box

Il glindesdi, ils 21 da zercladur a las 20:00 datti tar la tractanda 5 in'infurmaziun davart la lescha per charrar sin vias da prada, funs, guaud ed alps da la vischnanca Surses. Decidì davart la nova vegn ils 30 d'avust.

RTR actualitad 11:00

Artitgels legids il pli savens