Siglir tar il cuntegn

Header

cuntegn

Surses Vischnanca vul privatisar la resgia communala

La vischnanca da Surses ha laschà analisar la situaziun da la resgia. Sco ella scriva en ina communicaziun na possia il manaschi betg vegnir manà enavant a moda rentabla en sia furma e grondezza actuala.

Betg cuntanschì resultats da gestiun positivs

Ils onns passads n'hajan ins betg pudì cuntanscher resultats da gestiun positivs cun la resgia communala. Ultra da quai saja quai adina pli grev da chattar persunal qualifitgà. Vitiers vegnian fluctuaziuns natiralas da persunal ils proxims onns, scriva la vischnanca da Surses. Ma per tuttina porscher enavant ils servetschs ed ils products da la resgia, vul la vischnanca privatisar l’interpresa. La Uffer SA haja da principi interess da surprender l'areal en dretg da bajegiar per sviluppar là in center logistic modern da laina massiva. I n'è dentant betg anc cler sche la resgia vegn integrada en la Uffer SA u sche quai dat in'interpresa nova. Ils dus collavuraturs na vegnan betg relaschads.

Radunanza communala sto decider

La vischnanca da Surses ha suttascrit ina decleraziun d’intenziun cun la Uffer SA. Uss sto la radunanza communala approvar il contract en dretg da bajegiar cun la Uffer SA. Sche votantas e votants dian gea vegnan ils detagls examinads fin l’atun e la primavaira 2021 pudess ins cumenzar a realisar il project.

RTR novitads 18:00

Artitgels legids il pli savens

Scrollar a sanestra Scrollar a dretga