Il grip sur Brinzauls sa muventa il mument uschè spert sco dapi l'entschatta da las mesiraziuns il 2011 betg pli. La raschun saja la naiv che lieua, communitgescha la vischnanca d'Alvra. Er il vitg saja vid ruschnar adina pli svelt. Er quellas mesiraziuns, sajan mesiraziuns da record.
I saja perquai da quintar che la spertadad creschia vinavant e ch'i dettia numerusas crudadas da crappa las proximas emnas. Quai er da plirs 10'000 meters cubics. Cun ina crudada pli gronda, na fan ils experts però betg quint. Il svilup dal grip, vegnia il mument observà precis dal servetsch d'alarm.
Nagin alarm
Malgrà che la bova da Brinzauls sa muventa il mument uschè spert sco dapi l'entschatta da las mesiraziuns betg pli, na dattan ils geologs betg alarm. Stefan Schneider il manader dal servetsch da prevenziun, declera che la situaziun saja bain tendida, ma betg dramatica:
Ins haja supponì, ch'ils moviments dal terren s'augmentian vers primavaira. Per il vitg da Brinazuls na dettia dentant per il mument nagin privel pli aut, era sch'ils geologs quintan cun dapli crudadas da crappa il proxim temp. La probabilitad che la vischnanca da Brinazuls stuess vegnir evacuada quest onn, saja anc adina fitg pitschna.
Ord l'archiv:
L'october 2020 ha la vischnanca infurmà davart il stan actual da la bova. La populaziun ha plinavant er stuì ponderar nua ch'i vulessan ir a star en cas ch'il viver a Brinzauls daventass memia privlus.
