Ils da Schmitten (Ferrera) cumbattan dapi decennis per ch'il traffic da transit per Tavau tras lur vitg, vegni svià. La Dretgira administrativa dal Grischun ha uss refusà omadus recurs cunter il project chantunal. Inoltrà ils recurs avevan organisaziuns da la natira e persunas privatas gia la fin dal 2011, suenter ch'il chantun aveva dà glisch verda per il sviament.
Las organisaziuns d'ambient avevan bain renconuschì il basegn da Schmitten da schliar il problem cun il traffic da transit. Tenor lur avis donnegescha il sviament previs dentant memia fitg la natira e la cuntrada. Ellas avevan perquai pretendì, ch'i saja d'examinar ulteriuras schliaziuns pli cumpatiblas cun la natira. Ils recurrents pon anc trair vinavant la decisiun da la Dretgira administrativa.
Chantun sto pajar indemnisaziun extragiudiziala
Ils custs da dretgira da 15'000 francs ston d'ina vart la regenza grischuna e da l'autra vart las organisaziuns d'ambient e persunas privatas pajar. Plinavant ha la dretgira decidì che la regenza grischuna sto indemnisar las organisaziuns d'ambient e las persunas privatas ch'han inoltrà ils recurs cun tut en tut 66'000 francs.
La raschun per questa indemnisaziun è, che la documentaziun dal chantun per il project da sviament era manglusa. La dretgira ha stuì laschar elavurar in'expertisa per giudicar il cas ed è perquai persvasa, ch'ils recurs eran giustificats, cura ch'els èn vegnids inoltrads. Perquai hajan ils recurrents il dretg sin in'indemnisaziun extragiudiziala da la cunterpartida, pia da la regenza grischuna.
Ultra da quai no po il chantun respectiv la regenza betg spetgar in'indemnisaziun da las partidas. La dretgira scriva latiers, che Confederaziun, chantun u vischnancas sco er organisaziuns incumbensadas cun lezias dal dretg public, n'hajan nagin dretg sin indemnisaziuns, sch'els gudognan avant dretgira. Ed en il cas actual na dettia nagina raschun da far in'excepziun.
RR novitads 11:00