Il sboz va ussa en consultaziun tar las vischnancas. Quellas han peda enfin la fin da fanadur da pigliar posiziun. Suenter correcturas eventualas va il sboz da la nova lescha da turissem en consultaziun tar tut ils pertutgads, involvids en ils discurs duain vegnir ils possessurs d’abitaziuns da vacanzas, la hotellaria, sco era las differentas cuminanzas d’interess. Tenor Robert Wildhaber saja da quintar, che la nova lescha cun las taxas da turissem possia ir en votaziun en il decurs da l’enviern proxim. Che la nova lescha pudess ir en vigur gia sin l’emprim da schaner 2016 na saja betg realistic, Robert Wildhaber quinta che la nova lescha possia ir en vigur durant il mez dal 2016, sch’ella vegn acceptada dal suveran da Bravuogn e Filisur.
Entradas supplementaras per il turissem
La nova lescha da turissem vul abolir las taxas da cura che vegnan actualmain pajadas per persuna. Da nov duai dar pauschalas per ils hoteliers ed ils affittaders d’abitaziuns da vacanzas. Tenor Robert Wildhaber saja da quintar cun entradas supplementaras grazia la nova taxa da turissem.
