Siglir tar il cuntegn

Header

audio
Plans da nova pendiculara a Tschiertschen fruntan sin critica
Or da Actualitad dals 01.12.2021.
laschar ir. Durada: 2 minutas 45 Secundas.
cuntegn

Territori da skis Lai Arosa Organisaziuns d'ambient cunter colliaziun cun Tschiertschen

L'engrondiment dal territori da skis da Lai Arosa frunta sin resistenza tar las organisaziuns da l'ambient. La vischnanca da Tschiertschen planisescha danovamain da sa colliar cun il territori da skis grond. Quai cun ina pendiculara directa da Tschiertschen sin il Weisshorn ed ina pista tras l'Urdental.

Las organisaziun da l'ambient refusan però quest project da milliuns, sco quai ch'i ha num en ina communicaziun communabla da las organisaziuns da l'ambient sco il WWF u la Pro Natura. Ellas regordan las pendicularas vi dal cumpromiss ch'ins aveva negozià, cura che Lai ed Arosa eran sa colliads. Lura avevan ins numnadamain decis da desister da far accessibel l'Urdental e da metter quel sut zona da protecziun.

Betg pussibel da cumpensar

Tenor Anita Mazzetta, la manadra dil WWF Grischun na possian ins betg cumpensar ils donns chaschunads da la pendiculara cun simplamain rumper giu ils indrizs existents dal territori da skis da Tschiertschen. Era la pista planisada che manass en val saja problematica ord vista da l'ambient. Quella giess numnadamain gist atras ina zona da ruaus per la selvaschina.

Dapli traffic da freeriders

Tenor il president da vischnanca da Tschiertschen-Praden Roderick Galantay na saja quella zona gnanc uschè intacta. Mintg'onn giajan radund 5'000 freerides la tras. Sco quai che omadus dian, stuess'ins planisar cun tranter 4 enfin 5 giadas dapli traffic sche la nova pista vegniss construida. Quai è era in dals motivs daco ch'i na dat nagina collavuraziun tranter il WWF Grischun e la vischnanca Tschiertschen-Praden quai che pertutga quels plans.

RTR novitads 15:00

Artitgels legids il pli savens