Siglir tar il cuntegn

Grischun Central Territoris da skis pitschens rimnan donaziuns

Per ils territoris da skis pitschens daventa quai adina pli grev da surviver. En il Grischun Central èn gist duas interpresas vid rimnar daners: Bravuogn e Beiva.

Il Piz Darlux cun runal da skis
Legenda: Sch'il Piz Darlux a Bravuogn è cuntanschibel era il proxim enviern è anc intschert. mad

La Beiva Runals SA vul installar indrizs da far naiv, uschia che l’entira pista dal runal da Camon fiss accessibla sin naiv artifiziala. Dals custs totals da 500’000 francs duessan 100’000 francs vegnir ensemen entras donaziuns. Sco quai che Fridolin Vögeli, il president dal cussegl d’administraziun, ha ditg, ins haja probabel proximamain rimnà quella summa.

A Bravuogn vai per surviver

Bravuogn sto rimnar donaziuns en la valur da 250’000 francs. Vegn questa cifra betg cuntanschida è il manaschi da la proxima stagiun d’enviern periclità. Sco quai ch'il maina fatschenta Linard Gregori ha ditg, manchian il mument anc 30’000 francs. El è però optimistic da cuntanscher enfin la fin dal mais era questa summa. Uschiglio saja da ponderar d’avrir mo ina part dal territori da skis. Ils trais d’avust decida il cussegl d’administraziun il proxim agir.

RR actualitad 12:00