Pol Caglia, il lexicon da Casti, declera daco che Casti ha num Casti, schegea ch'i na dat nagin chastè.
Para avevai avant blers tschientaners ina curt roiala gist sper la baselgia dad oz. Quella purtava il num «castellum impitinis». Las perunas ch'abitavan en quella curt numnavan sa sez retgs, schegea ch'els n'avevan nagin chastè. Ma els avevan quella curt ch'era circumdada d'in mir – sco tar in chastè. Quels «retgs» pretendevan lura da mintgin che leva passar la punt a Casti in dazi ed han uschia gì ina gronda pussanza. E da quella curt roiala deriva il pled «Casti», declera Pol Caglia.
Il brischament d'avant 130 onns
In'auter punct fitg impurtant en l'istorgia da Casti è il brischament ch'ha bunamain destruì l'entir vitg. Da las 70 chasas e clavads ch'i aveva da lezzas uras, stevan suenter il brischament anc 6.
Naginas persunas u animals sajan vegnidas blessadas, ma ils donns finanzials sajan stads immens. Enturn 300'000 francs sajan stads ils donns, sa Pol Caglia, in'immensa summa per lez temp.
Ma la solidaritad dals vitgs vischinants e da l'exteriur saja stada gronda. Ils abitants che han pers tut, hajan pudì abitar en ils vitgs vischinants fin che Casti era puspè bajegià si. Auters han gidà il vitg en Grischun central cunzunt cun donaziuns. Uschia sajan donaziuns vegnidas da l'entir mund. Tranter auter da New York, Roma e Son Petersburg. La finala saja Casti stà bajegià si fitg spert. Ma cun in auter caracter, declera Pol Caglia.
Avant il brischament il 1890, saja il vitg vegnì bajegià dretg e sanester da la via siadora en ina lingia. Suenter il brischament hajan ins bajegia cun dapli distanza in da l'auter, novs materials, pia betg pli lain e betg pli en ina lingia.
Fastizs dal brischament
Il sulet fastiz dal brischament è il vegl «pastrigl» ch'ha survivì il brischament. La chasa da crap stat anc oz ma na vegn betg pli duvrada.
