Il vitg da Tinizong sa chatta sut in guaud da protecziun, che protegia ils abitants da crudada da crappa e glatsch. Ina part dal vitg sa chatta en ina zona da privel. En il guaud datti dentant blera selvaschina, che mangia las plantinas. Regiuvinar il guaud è perquai fitg grev, ha la vischnanca da Surses scrit en ina brev a l’uffizi da guaud e pestga dal Grischun.
Memia blera selvaschina
Tar il chantin ins piglia serius ils giavischs da la vischnanca da Surses, cun tranter auter augmentar il plan da reducziun da selvaschina e cun avrir ils asils per dus dis durant la chatscha. Quellas mesiras na van dentant betg uschè lunsch sco proponì da la suprastanza da la vischnanca da Surses. Quella reduciss gugent il dumber da selvaschina sin il stan da l’onn 2000.
Guaud da Tinizong è vegl
Il selvicultur da la vischnanca da Surses Peter Janutin ha ditg, ch’il guaud saja vegl ed ins stoppia agir e pigliar mesiras, ils proxims tschintg onns ins stoppia realisar mesiras cunter il privel che creschia mintg’onn dapli. Ina varianta pussaivla saja era da far in rempar nua che la crudada da crappa saja il pli grond. In project concret na dettia per il mument però nagin.
RR novitads 17:00