Cun bunamain 90% dal lain grischun che vegn il mument exportà enstagl da nizzegià en la regiun èsi stà temp per midar insatge. E sin l'areal Gravas sut Tinizong han ins midà insatge: ina nova resgia regiunala cun il num «resurses». La resgia duai ina giada elavurar fin 70'000 meters cubic laina. Ina summa ambiziusa, ma pussaivla.
Proxima primavaira va la resgia lura propi en funcziun e fa cun quai l'emprim grond pass per puspè tegnair la laina là nua ch'ella crescha. La visiun da «resurses» na duess dentant betg esser a fin qua, la finamira saja ch’il vegnia a partir dal 2025 en l’entir Grischun sulettamain elavurà laina grischuna. Plans per duas ulteriuras resgias regiunalas en il Grischun èn schon sin maisa.
L'iniziant dal project Enrico Uffer di, ch'els hajan buns contacts cun la selvicultura e cun ils partenaris. Els sajan persvas ch'els hajan avunda laina e ch'i dettia ina buna collavuraziun, uschia che tuts possian profitar.
Collavuraziun
E lain ha il Grischun en abundanza. Enstagl da concurrenzar cun las firmas da la regiun hajan ins prendì quellas a partir da l'entschatta er en la bartga. La resgia, topmoderna cun la pli nova tecnologia ch'i dat il mument, custa radund 14 milliuns francs. Raps che sajan instestids bain. Gist en Svizra, cun las pajas autas saja impurtant da tagnair bass il persunal, ma l'investiziun saja in zic pli auta. Ma tras quai sajan ins persvas da pudair lavurar fitg effizient e cun pauc persunal, di il futur manader da la resgia Gian Andri Capeder. Effizient saja la resgia er puncto energia, il bostg duai vagnir utilisà dad A fin Z. L'onur d'inaugurar l'emprim tagl or da la centrala ha il president communal da Surses Leo Thomman gì. Sco anteriur selvicultur e president da SELVA ha el gist gì trais giadas plaschair ch'il project ambizius è vegnì a funcziunar uschè spert. La nova resgia na saja betg be ina schanza per la selvicultura, mabain per l'entira regiun.