Siglir tar il cuntegn
Inhalt

Grischun Central Tinizong survegn puspè in’ustaria ed ina butia

Glindesdi ils 17 d’avust cumenzan las lavurs per il center «La Scuntrada» amez Tinizong. Cun in credit da 1,9 milliuns francs ch’è vegnì approvà da la radunanza communala da Tinizong-Rona l’atun passà, vegn la halla da gimnastica veglia transfurmada en in’ustaria cun ina pitschna butia.

En la halla da gimnastica (da vart dretga) vegn construida la nova ustaria cun butia.
Legenda: En la halla da gimnastica (da vart dretga) vegn construida la nova ustaria cun butia. RTR, F. Belotti
Uschia duai il nov center «La Scuntrada» vusair ora.
Legenda: Uschia duai il nov center «La Scuntrada» vusair ora. mad

Las lavurs da construcziun vegnan a cuzzar radund in onn. Ils indrizs vegnan finanziads da l’Uniun da Promoturs «La Scuntrada». Ils commembers da l’uniun ston pajar ina taxa d’entrada tranter 500 e 50’000 francs, ils tals che vegnan indemnisads cun bons da cumpra annuals (3% da la summa pajada) per la butia e l’ustaria. Suenter in temp minimal da trais u tschintg onns pon ils commembers da l’uniun avair enavos ils daners sin giavisch. Sco quai che la presidenta Tina Nüesch-Felber ha ditg, spera ella da pudair rimnar tranter 250’000 fin 300’000 francs. Enfin ussa haja l’uniun gia rimnà 100’000 francs, e quai mo radund in’emna suenter ch’ils prospects da l’uniun èn vegnids repartids en las chasadas dal Surses. Cun ils daners rimnads duai il nov fittadin, che vegn anc tschertgà da l’uniun, finanziar l’interiur da l’ustaria e da la butia.

Festa da vischnanca

La sonda ils 15 d’avust a partir da las quatter il suentermezdi datti ina festa da vischnanca a Tinizong, quai sin la plazza da vischnanca e tar schlet’aura en la halla da gimnastica, il lieu nua che la nova ustaria vegn construida.