Il quint è simpel: enstagl da 25 minutas cun il tren vegn il viadi a cuzzar tranter Filisur e Tavau cun il bus 54 minutas. La Viafier retica remplazza differents trens cun bus pervi da la situaziun da persunal tendida. I mancan locomotivistas e locomotivists, scriva la Retica la fin da schaner.
Ina petiziun pretenda ussa in stop sin donn e cust dals pendularis indigens. La petiziun lantschada il di da la communicaziun da la Retica han fin ussa suttascrit schon prest 900 persunas. Sustegn vegn er da vart la vischnanca da Bravuogn Filisur. Il president communal Luzi Schutz spera ensemen cun ses collega da Tavau Philipp Wilhem che la direcziun da la Retica e l'uffizi chantunal da traffic reponderescha la decisiun.
Petiziun cun grond success
Birgit Ottmer ch'ha lantschà la petiziun è intgantada dal resun positiv. Che prest 900 persunas han suttascrit en pauc dis la petiziun e che 37% scrivan dad esser directamaint pertutgà da la decisiun da la Retica mussia la relevanza da la problematica. Ina tal ferma resistenza na possia betg vegnir ignorada.
Midadas pauc pussaivel
Da vart da la Retica vegn argumentà cun la mancanza da personal. Quella hajan ins bain vis a vegnir, dentant malgrà ina taskforce installada la primavaira, sajan ins vegnì surprendì, ha il pledader da la Viafier retica Simon Rageth argumentà envers RTR. Ins haja chapientscha per la posiziun da la petiziun ed ins saja pront da discurrer cun las autoritads communalas da las regiuns pertutgadas. Il mument dentant na saja en vista nagin'autra soluziun che quella communitgada la fin da schaner.
