Auto ars ora datiers da Domat
Sin l'autostrada A13, datiers da Domat è in auto ars ora la sonda enturn las diesch e mesa. Persunas n'èn betg vegnidas blessadas, ha communitgà la Polizia chantunala.
In manischunz da 53 onns era sin via da Cuira en direcziun Rothenbrunnen. Cura ch'el ha sentì ch'il motor aveva problems è el immediat ì sin il vial da panna, ed el ha vis fim che vegniva or dal viertgel dal motor. Per las lavurs da stizzar è l'A13 vegnida serrada per in mument dal tuttafatg en direcziun sid. Las indesch e mesa è il lieu da l'accident stà rumì.
In accident individual en il tunnel Crapteig
En il tunnel da Crapteig sin l'A13 hai dà la sonda en damaun curt avant las sis in accident individual, ina manischunza è sa blessada mez grev. La dunna da 46 onns ch’era sin via da Tusaun en direcziun Andeer è vegnida transportada en l'ospital a Tusaun, ha communitgà la Polizia chantunala.
Ella era ida memia fitg da vart dretga, en ina nischa dad SOS e collidada là cun in indriz che duai mitigiar ina collisiun. Per rumir il lieu da l'accident èn stads en acziun 35 pumpiers e collavuraturs da l'Uffizi da construcziun bassa. Sin il vial sid hai dà temporarmain gronds impediments da traffic.
Luf è vegnì sut auto
Venderdi marvegl avant l'ina è in luf vegnì sut in auto sin l'autostrada A13 datiers da l'extrada Cuira-Nord. Co il mastgel è vegnì sin l'autostrada na saja betg cler, ha communitgà l'Uffizi da chatscha e pestga. Per eruir tge luf che quai era, vegnia il cadaver examinà geneticamain en il labor da l'universitad da Losanna.
Mesiras da segirezza realisadas ils davos onns en il tunnel Crapteig:
