La via chantunala tranter Razén e la staziun da Giuvaulta è puspè averta. Quai communitgescha l'Uffizi da construcziun bassa dal Grischun.
Pervi da la ferma plievgia era en il decurs dal glindesdi ina bova vegnida giu sin la via chantunala. Crappa e glitta èn sa distatgads tras la ferma plievgia radund 150 meters sur la via chantunala tranter Razén e Giuvaulta. Las raits existentas da protecziun cunter crudada da crappa han fermà ina gronda part dal material.
En il decurs da l'emna proxima vegn l'uffizi da construcziun bassa a reparar la rait da protecziun existenta. Questas lavurs possian ins realisar senza gronds impediments dal traffic, scriva l'uffizi.
Ils trens da la Viafier retica curseschan era puspè tranter Razén e Tusaun. Quai ha la Viafier retica communitgà. Il traject è stà serrà davent da glindesdi vers saira, pervi dal privel d'in sbuvaditsch tranter las staziuns da Razén e Giuvaulta.