Il lai s’empleneschia sco giavischà, uschia ch'els sajan cuntents cun il decurs dal project, quai ha ditg Hanspeter Grass ch'è president dal cussegl d’administraziun dals Runals da Tschappina. Els sajan da buna speranza, ch’i possian gia l’enviern proxim nizzegiar l’aua per far naiv. Il lai da Lüsch reactivà vegn ad avair ina capacitad d’enfin 100’000 meters cubics. Quai è 20 giadas uschè bler sco quai ch’il lai artifizial existent porscha.
Memia pauc'aua per far naiv
Ils davos onns haja adina puspè dà memia pauc’aua per far naiv, ha ditg Grass. Cun il Lai da Lüsch vegnan ils problems a tutgar al passà, sch’i dat alura ina lubientscha definitiva. Il test actual cuzza trais enfin tschintg onns. Tranter auter sto vegnir examinà, sche l’aua n’ha nagin effect sin il terratsch da la Mantogna. In rapport geologic na va betg or da quai. Pli baud ins quintava, ch’il lai saja responsabel per bovas en la val. Perquai era il Lai da Lüsch vegnì svidà.