Siglir tar il cuntegn

Grischun Central Tumleastga: Ovras electricas ston prender mesiras

L'Ovra electrica da la citad da Turitg EWZ e las Ovras electricas dal Rain posteriur SA chaschunan ensemen differenzas dal nivel da l'aua en il Rain posteriur ed en l'Alvra. Perquai pretenda la regenza ussa ch'ellas elimineschan las differenzas.

Carta geografica
Legenda: Carta geografica Uffizi federal da topografia

En ils territoris da la Mantogna e da la Tumleastga mainan l'Ovra electrica da la citad da Turitg (ewz) mintgamai in'ovra electrica a Seglias ed a Giuvaulta, las Ovras electricas dal Rain posteriur SA in'ovra a Seglias e las Ovras electricas Zervreila SA duas ovras electricas a Giuvaulta. Questas ovras chaschunan ensemen differenzas dal nivel da l'aua en il Rain posteriur ed en l'Alvra.

Pertutgadas èn las zonas umidas dal Rain a Razén ch'èn d'impurtanza naziunala. Chaschunadas vegnan questas differenzas tras midadas da la deflussiun da l'aua en il sectur sut la restituziun da l'aua da las ovras electricas. La regenza ha obligà las societads d'ovras electricas numnadas da prender mesiras per evitar u per eliminar questas pregiudicaziuns. Mesiras da sanaziun concretas ston vegnir definidas en il rom d'ina ulteriura projectaziun.