La situaziun per il suveran da la vischnanca da Tumleastga na savess betg esser meglra per las elecziuns dals 26 da settember. Gist quatter persunas vulessan daventar president da vischnanca.
D'ina vart èn quai ils dus suprastants actuals Ursula Tscharner-Bernold da Veulden e Pius Giger da Paspels. Els èn gia divers onns en suprastanza communala ed han er medem bunas schanzas da vegnir eligids. Tar las davosas elecziuns per la perioda d'uffizi era la differenza sulettamain ina vusch.
Dus novs
Samuel Wahlen è cun 40 onns il giuven dal quartett, Othmar Caviezel cun 70 il vegl. Caviezel è segiramain pli enconuschent, cunquai ch'el ha ina firma da construcziun ed è il medem mument er teolog laic. Wahlen perencunter è scolast ed è enconuschent a la generaziun pli giuvna.
Segund scrutini probabel
Cun quatter candidats è la probabiltad gronda ch'i dat in segund scrutini. Quel è ils 24 d'october. A l'elecziun èsì vegnì cunquai che Werner Natter ha annunzià l'entschatta favrer sia demissiun per la fin da l'onn.