Siglir tar il cuntegn

Header

cuntegn

Tunnel per A13 Comité da Spleia va davant dretgira

Suenter che Berna ha ditg na, ha il comité fatg in recurs tar il Tribunal dadministrativ federal. Quel pretenda che la Confederaziun fetschia mo il necessari per sanar l'A13, per uschia betg retardar las lavurs en connex cun in eventual tunnel per sviar Spleia.

L'autostrada A13 a Spleia duess svanir sut terra. Quai pretenda il comité d'acziun Valragn. In tunnel saja la meglra soluziun per l'avegnir, dian ils iniziants. Il schaner è la cumissiun da traffic dal Cussegl dals chantuns s’occupada cun la petiziun da Spleia. Quella è vegnida refusada cun 8:1 vuschs e quatter abstenziuns.

audio
Or da l'archiv: Petiziun per in tunnel a Spleia è vegnida refusada
ord Actualitad dals 12.01.2023. Maletg: RTR
laschar ir. Durada: 3 minutas 34 Secundas.

Il schaner ha il president communal Christian Simmen ditg, che la vischnanca veglia far tut il pussibel per ch'in tunnel possia vegnir bajegià a Spleia.

Refusà dal Uvek

Il comité d'acziun Valragn è vegnì infurmà dal Departament federal per ambient, traffic, energia e communicaziun (Uvek) ch'il recurs saja vegnì refusà. Cunter questa decisiun vul il comité uss ir davant il Tribunal administrativ federal. Sin questa via duai la sanaziun da quest traject da la via vegnir franada. «Quai cun la finamira da survegnir dapli temp per che las autoritads e la politica han temp da giuditgar a moda cumplessiva la situaziun a Spleia», hai num en la communicaziun. La tema è numnadamain che la construcziun d'in tunnel vegn pli nunrealistica sche la via vegn proximamain sanada.

Entant hajan gia gì lieu intgins inscunters da contractivas cun la regenza, l'Uffizi federal da vias (Astra) e la vischnanca. Quai per chattar ina pussaivladad per integrar in tunnel en il program dal svilup strategic da la Confederaziun cun il num Step. In spazi da temp na saja dentant anc betg definì.

Per cuvrir ils custs d'advocat da radund 5'000 francs per il recurs, rimna il comité uss daners. Sco quai che Christian Mengelt, il pledader dal comité d'acziun ha ditg envers RTR, n'hajan ins betg anc cuntanschì questa summa. En il mender cas paja il comité il recurs dentant ord atgna bursa. Il recurs è vegnì inoltrà al Tribunal administrativ federal ils 8 da matg.

RTR actualitad 12:00

Artitgels legids il pli savens

Scrollar a sanestra Scrollar a dretga