Tenor la glista da tractandas per la 7avla radunanza generala ordinaria dals 24 da settember 2025 propona il cussegl administrativ da la TVS SA da reeleger Gregor Vellacher sco commember per in ulteriur onn. Il medem mument vegnan fatgas elecziuns novas impurtantas. La cumissiun da tschertga propona a la radunanza generala d'eleger tschintg novas commembras e novs commembers en il cussegl d'administraziun. I sa tracta da Luzius Wirth, Domenico Bergamin, Janine Arpagaus, Lothar Künzli e Curdin Baltermia. La perioda d'uffizi cuzza medemamain in onn.
Luziuns Wirth duess presidiar societad anonima da turissem
Luzius Wirth vegnia proponì sco candidat per il presidi, ha ditg Patrick Thurner da la cumissiun da recrutaziun. L'elecziun formala dal president na succeda dentant betg entras la radunanza generala sezza. Il presidi vegn constituì pir suenter la radunanza generala dal cussegl d' administraziun nov e vegn elegì da ses ravugl. Plinavant ha Thurner ditg ch'ins proponia anc ina setavla persuna per il cussegl d'administraziun, il mument sajan ins en discussiun cun trais persunas.
La directura banduna l'organisaziun
Tar l’organisaziun da turissem dal Surses datti anc in’autra midada. La directura Tanja Amacher ch’è dapi quasi indesch onns en uffezi, chala sin la fin da favrer. Quella plazza n’è betg anc scritta ora, quai pudess succeder anc quest onn suenter ch’il nov cussegl d’administraziun è elegì.