Il temp da la tur cotschna sin il pass dal Güglia va a fin l'avust 2023. Lura ston ils organisaturs stgarpar giu l'edifizi marcant, ch'è daventà er in simbol per il festival. La tur saja in bajetg temporar e suenter il temp d'existenza (2017 – 2023) sa mussian er emprims donns ha Giovanni Netzer, l'intendant dad Origen, ditg vers RTR.
Tschertas parts da la tur (laina, vaider, installaziuns electricas e tecnica da tribuna) vegnian duvradas en las novas infrastructuras. «Ina segunda tur cotschna, er ina pli pitschna na vegnia segiramain betg a dar», tradescha Netzer. Dapli na sappia el dentant er betg anc.
La tur alva sco omagi
La tur alva planisada a Mulegns saja in omagi a pastiziers. Il plans da construir la tur da 4,1 milliuns francs cun in’autezza da passa 30 meters prevesan d’entschaiver a construir ils singuls elements da la tur a partir da l’october da quest onn. Quels vegnan fatgs da la Scola Politecnica da Turitg ETH tenor in nov sistem da stampar cun betun. Il mument èn publitgadas las dumondas da construcziun.
Turs cun gronda simbolica per il teater sacral
La turs hajan ina gronda impurtanza per il teater sacral cunquai ch'ellas simboliseschan la colliaziun tranter il mund ed il tschiel. La tur alva dals Mulegns saja dentant naschida or da la mancanza da spazi en vischnanca, raquinta Giovanni Netzer da l'idea. Che turs èn dentant impurtanast per il festival Origen, quai sco objects ed er sco cuntegn da program, saja da contribuir al fatg ch'ins sa fatschenta cun il teater sacral.
