Alex Fabbri che ha ragischs datiers da Bologna en Italia è vendider cun corp ed olma, e quai gia in mez tschientaner. Mez avrigl ha el festivà ses 95avel anniversari ed il giubileum da 50 onns da sia stizun ensemen cun la clientella ed ina surpraisa musicala dals «Tagsteinmusikanten» da Tusaun.
«I marscha da nar»
Pli baud saja el vegnì si dal Tessin cun il camiun cun fritgs e verdura per distribuir en la regiun. Suenter ch'el aveva sa chasà ils onns 60 a Tusaun haja el il 1972 gì la chaschun da surpigliar ina pitschna stizun, e quella maina el fin oz. Ils grossists n'haja el mai vesì sco concurrenza. El haja pudì cumprar en per buns pretschs en il Tessin e tar ils purs ed haja pudì dar vinavant ils buns pretschs a sia clientella ed uschia haja el pudì surviver. La buna qualitad ed ils buns pretschs sajan il misteri per ses success. Clientella ha Alex Fabbri da dapertut enturn. El è encunoschent er sur ils cunfins da la regiun. La glieud vegni da la mesa Svizra per far cumissiuns tar el.
I marscha da nar, jau na poss betg chalar e stoss vegnir 100 qua en mia stizun.
Cun 70 onns haja el ina giada pensà da chalar, mo igl na saja simplamain betg ì. Uschia ch'Alex Fabbri stat er 25 onns suenter ch'el ha vulì chalar cun oz 95 onns anc adina plirs dis ad emna en sia pitschna stizun a la Neudorfstrasse a Tusaun e venda schambun, salami, chaschiel, pasta frestga e confitura che sia dunna Elsi fa sez.
Jau stoss esser tranter la glieud, qua dovr jau. Discutar e baterlar – e vender, jau sun naschì per vender.
