Siglir tar il cuntegn

Header

cuntegn

Tusaun Approvà preventiv che quinta cun in minus da 2 milliuns francs

Il preventiv 2024 da la vischnanca da Tusaun prevesa in surpli d'expensas da bunamain 2 milliuns francs – quai tar entradas ed expensas da tranter 31 e 33 milliuns francs. La radunanza communala ha approvà il preventiv, sco er il quint d'investiziuns, sco igl è scrit en ina communicaziun.

Tusaun quinta cun investiziuns nettas da radund 3,6 milliuns francs. Ultra da quai han ils da Tusaun decis da laschar il pe da taglia sin 115% da la taglia chantunala simpla.

Sco la vischnanca scriva saja la situaziun finanziala en la vischnanca tendida. La cumissiun da finanzas saja sa fatschentada cun quai intensivamain. Tranter auter hajan ins constatà che tschertas decisiuns strategicas hajan gì immensas consequenzas. Uss stoppian ins reagir e bain ponderar proximas decisiuns. Tranter auter vulan ins er includer la populaziun ed esser transparent.

Acceptà ierta dal «Schlössli»

Plinavant ha la radunanza communala decis dad acceptar l'ierta dal «Schlössli» da Dr. Peter Urs Veragut ch'è mort il fanadur 2022. Il «Schlössli» vegn datà sin l'onn 1670 e stoppia vegnir sanà. Immediat stoppian ins investir radund 700'000 francs ed ins quinta cun ulteriurs 380'000 francs ils proxims 10 onns. Las stanzas sajan previsas da dar en locaziun.

RTR novitads 12:00

Artitgels legids il pli savens