Il kino da Tusaun duess en l’avegnir vegnì duvrà pli multifar, ha ditg Mirjam Maurizio, ina da las auturas da la nova strategia. Betg mo il kino duess star en il center da la visita. Il kino duess esser in lieu cun divers eveniments, nua che la glieud possia s’inscuntrar e sa barattar. Mo ir en il kino a guardar in film, quai na saja ozendi betg pli uschè dumandà. Sper mussar films duess il kino en l’avegnir vegnì duvrà pli savens per occurrenzas, teater, disco, concerts ed era eveniments ch’ins na sappia oz betg anc definir. Naginas midadas duessi dar tar ils Dis dal film Mundial ch’han lieu mintg’onn. Quels duessan vinavant vegnir manads tras d’ina uniun da promoturs.
Novas structuras èn dumandadas
Per realisar tut las novas ideas dovria novas structuras entaifer l’uniun. La branscha da kino stettia davant grondas sfidas, ha ditg Gabriela Brönimann, che fa part a la suprastanza dal kino da Tusaun. L’idea saja, da far pli pitschna la suprastanza. Dad oz 7 fin 11 commembras e commembers duess la suprastanza vegnir sminuì sin 3 fin 5 persunas. Diversas persunas han gia annunzià l'interess. Plinavant duessi dar da nov in presidi. Las elecziuns èn planisadas per l’emprim da zercladur. Era duess la direcziun betg pli esser preschenta en la suprastanza. Ils divers ressorts che vegnan stgaffids duessan pudair decider autonom entaifer lur preventiv. Ils ressorts ch’èn planisads duessan tuts survegnir in agen manader u ina manadra. En tut duessi dar tschintg ressorts. Quai èn: kino/film, palc e musica, coordinaziun ed infurmaziun, finanzas e servetschs cun bar, gastronomia e locaziuns. L’idea per il futur a lunga vista saja da pudair realisar in secretariat che maina il kino professiunalmain.
Grond sustegn da la populaziun
L’uniun dal kino da Tusaun (fundada avant 33 onns) dumbra actualmain dapli che 700 commembras e commembers. Plinavant sa participeschan 11 vischnancas da la regiun vi da l’uniun.
Virivaris en la suprastanza
Il 2020 è ina gronda part da la suprastanza sa retratga e mo trais persunas èn restadas. Sin basa da questas retratgas ha ina gruppa accumpagnanta elavurà la strategia menziunada. La quintessenza è stada ch’i dovria ina midada da generaziun entaifer l’uniun. Sco quai che Gabriela Brönimann ha ditg, saja la raschun per il conflict probabel stada la structura da l’uniun. Uschia saja la direcziun il medem temp stada en la suprastanza e quai haja adina puspè chaschunà conflicts. Perquai che commembers da la suprastanza hajan gì il sentiment, che la direcziun haja discurrì memia fitg tranteren en lur ressorts.
