Il sport da prestaziun è dependent d’ina assistenza da medischina da sport professiunala. Perquai certifitgescha Swiss Olympic instituziuns medicinalas che s’engaschan per il sport d'elita ed ils giuvens. En Svizra datti 40 instituziuns ch'han il label sco basa medicinala da sport.
In center betg mo per profis
Sco quai che l’ospital da Tusaun scriva en ina communicaziun, saja el l’emprim post da consultaziun per sportistas e per sportists da massa, da generaziun giuvna e da sport d’elita. Saja quai per augmentar la prestaziun professiunala, per la prevenziun da la sanadad u per il tractament e per l’assistenza suenter ina blessura. «Nus essan fitg loschs che nus essan vegnids certifitgads da nov ensemen cun 11 auters manaschis da tut la Svizra. Quai è ina motivaziun supplementara per cuntinuar cun nossa via d’assistenza cumplessiva da las sportistas e dals sportists – saja quai per il sport d’elita u er per il sport da massa» ha ditg schefmedi Martin Maleck il mardi saira a Tusaun.