Siglir tar il cuntegn

Header

audio
La visiun dal festival da musica Secret Garden
Or da Actualitad dals 23.07.2021.
laschar ir. Durada: 02:23 minutas.
cuntegn

Urs Auchter Ustier, cuschinier, organisatur e gidanter en in pajais en svilup

Davent dad ier gievgia vegni puspè fatg festa a Lai. Per la segunda giada ha il festival da musica Secret Garden lieu sper l'hotel Crest'ota sur il vitg. Las proximas trais emnas stattan mintgamai da gievgia enfin dumengia differentas bands sco era il festival Origen sin tribuna.

A Lai davant il restaurant Crest'ota è tut pront per la segunda saira dal festival. Quai cun ina tribuna, giascheras e bancs da festa ch'envidan da passentar in pèr bunas uras. I n'è betg in festival usità, di Urs Auchter, president da l'uniun dal Secret Garden:

Quai è in open air cun sutgas da sulegl, nua ch’ins po giaschair e giudair concerts sco a chasa en curtin cun insatge bun da mangiar.
Autur: Urs Auchter cuschinier, ustier ed organisatur

Il festival è vegnì fundà l'onn passà, cura che corona ha mess il mund d'events sin il chau. Cunquai ch’igl aveva num da passentar las vacanzas en Svizra, vulevan ils organisaturs porscher insatge spezial. Uschia che l'idea per far insatge sin il grond prà da fluras davant il restaurant è naschida. Ils giasts pon era giudair musica svizra e tratgas regiunalas.

audio
Urs Auchter e sias visiuns
03:07 min, Actualitad dals 23.07.2021.
laschar ir. Durada: 03:07 minutas.

 Tschertgar sponsurs

L'onn passà era il festival vegnì finanzià cun ils daners che la Confederaziun ha dà sco sustegn finanzial per events durant il temp da corona. Quest onn è l'uniun Secret Garden che organisescha l'open air, ida a la tschertga da sponsurs. Ed els han chattà blers ch'èn interessads vi da l'event.

Artists ed artistas enconuschentas

Betg mo sponsurs, mabain era artists ed artistas èn persvadids dal festival e leds da puspè star sin tribuna.

Damai ch’i na dat betg blers gronds festivals, avain nus gì il cletg da survegnir musicists fitg renumads. Nus avain Adrian Stern, Dodo, Sina, Rita Roof, 77 Bombay Street, propi nums ch’ins enconuscha en Svizra.
Autur: Urs Auchter cuschinier, ustier ed organisatur

 

Sustegnair musicists e musicistas da la Svizra, Rumantschs e newcomers

La filosofia dal Secret Garden è da sustegnair musicistas e musicits da la Svizra. Era newcomers e da quels pli pauc enconuschents duessan vegnir sustegnids. Chantaduras e chantadurs rumantschs vegnan sa chapescha era engaschads per l'open air. L'onn passà era quai Mattiu Defuns. Quest onn vegn Dario Hess cun sia band Spanky Hammers a beneventar ils maximal 450 aspectaturs ed aspectaturas.

Datums dal festival da musica

Avrir la box Serrar la box

Il festival da musica Secret Garden ha lieu dals 22 da fanadur enfin ils 8 d'avust 2021 – mintgamai gievgia enfin dumengia. Ils tickets pon ins be cumprar ordavant online.

Adina puspè novs projects

Urs Auchter ha gidà da furmar ina scola da cuschiniers e cuschinieras, sco era ina scola per cuschiniers surds en il Myanmar en l’Asia. Normalmain è el durant la stad adina en il Myanmar e dat scola a las cuschinieras e cuschiniers.

audio
Urs Auchter gida en il Myanmar
03:26 min, Actualitad dals 23.07.2021.
laschar ir. Durada: 03:26 minutas.

Dapi questa stad maina Urs Auchter l'hotel Crest'ota a Lai. Uss n'è el pli che in onn e mez betg pli stà en il Myanmar. Per l'ina pervia da corona e per l'autra pervia da la situaziun d'urgenza che vala per il mument là. Il militar ha numnadamain fatg il favrer in putsch e la democrazia è puspè sin via tar ina dictatura sco avant 10 onns.

Damai ch’Urs Auchter è uss la stad en il Grischun, organisescha el per la segunda giada il festival da musica Secret Garden – cun ils patratgs è el però tar ses scolaras e sias scolaras en il Myanmar.

RTR actualitad 07:00

Artitgels legids il pli savens

Scrollar a sanestra Scrollar a dretga