In u plirs urs èn da viadi en il Grischun. Sin la pagina d'internet dal chantun vegnan ils moviments, ils fastizs, da l'urs registrads. En tut ha il chantun inditgà 15 cumprovas da l'urs da questa primavaira.
Emprims fastizs han ins chatta la fin d'avrigl en Val S-charl, la fin da matg è l'urs alura vegnì fotografà duas giadas d'ina trapla fotografica en l'Engiadina.
Il zercladur hai dà cumprovas da l'urs en il Grischun Central. La sonda passada han ins chattà excrements datiers da Filisur, il mardi hai dà ina fotografia da l'urs en la vischinanza da Bravuogn
Probabel sa tractia quai dal medem animal ch'è vegnì vis en l'Engiadina, ha confermà Arno Puorger, da l'Uffizi chantunal da chatscha envers RTR.
Urs giuvens vegnan stgatschads da la mamma, sco ch'els èn creschids. Ils mastgels van per il mund enturn a la tschertga d'in agen territori. Urs giuvens dal Trentino surpassan adina puspè il cunfin en direcziun Svizra. Quai na saja nagut spezial, di Sven Buchmann, spezialist d'animals selvadis tar Kora, l'organisaziun che sa fatschenta cun animals stgarpants ed il monitoring da quels.
In turist
L'urs è pia plitost in turist, in osp temporar. Ch'el va enfin en il Grischun Central saja nunusità, schabegia dentant mintgatant, di Swen Buchmann.
Impurtant è ch'ins evitescha pavel per l'urs en il rument.
Era sch'i dettia en il Grischun nutriment e spazi per l'urs manchia ina femella. Perquai cuntinueschan ils urs era lur viadi. Dapi passa 100 onns n'hai dà nagina reproducziun d'in urs en la Svizra, di Sven Buchmann.
Urs pon sviluppar cumportament privlus
Per l'expert datti dus facturs per ch'in urs fa problems. Per l'ina possia el surpigliar quest cumportament da la mamma, sche quella haja gia in cumportament problematic. Per l'autra pon urs s'adattar ed emprender da nizzegiar rument sco nutriment. Entras quai pon els perder la retegnientscha envers il carstgaun.
In exempel è stà «JJ3» – in urs ch'ha stuì vegnir sajettà il 2008.
L'urs actual na mussa nagins segns per in cumportament problematic. Quai conferma era Arno Puorger.