Val d’Alvra – spierta Bus alpin vegn dublegiada

L'Uniun Bus alpin porscha a partir dals 25 da zercladur duas giadas uschè bleras colliaziuns da bus tranter La Punt e Bravuogn sco enfin uss. Quai ha communitgà l'Uniun Bus alpin.

Il lai da Palpuogna Bild in Lightbox öffnen.

Legenda da maletgs: Access pli spess a l’Alvra - questa stad van nov 3 bus davent da La Punt e 4 bus davent da Bravuogn sin il pass. Keystone

L'Uniun Bus alpin porscha a partir dals 25 da zercladur duas giadas uschè bleras colliaziuns da bus tranter La Punt e Bravuogn sco enfin uss. Quai ha communitgà l'Uniun Bus alpin.

Uschia van questa stad nov 3 bus davent da La Punt e 4 bus davent da Bravuogn sin il pass da l’Alvra. In test da la purschida era vegnì fatg dal 2015 cun il num «AlbulaBUS».

A lunga vista speran ils purschiders locals sin 1’000 passagiers ad onn per il bus sin clom. Da Bravuogn en Val Tuor datti gia dapi intgins onns 2 curs al di. Quella purschida è vegnida augmentada sin 3 curs l’onn passà.

L’Uniun bus alpin porscha questa stad en tut 13 colliaziuns da bus en regiuns da muntogna da la Svizra nua ch'i na dat uschiglio nagin traffic public ubain mo pauc. L'Uniun è vegnida fundada l'onn 2011. Purtaders naziunals èn Auto da posta Svizra SA, il Club alpin svizzer CAS, la Gruppa svizra per las regiuns da muntogna SAB e l’Associaziun traffic ed ambient (ATA).

RR novitads 10:00