Sco quai che Sina-Mara Hassler ha ditg envers l’ANR, veglia ella realisar ils giavischs dals Rumantschs da la regiun, organisar scuntradas tematicas e cafés rumantschs e visitar scolas e scolettas. Durant ils mais da stad veglia ella sa lavurar en, survegnir ina survista da quai ch’i dettia da far e preparar la midada dal biro davent da Ziràn a Vargistagn en il center da Capricorns. Sco moto da sia lavur vesa Sina-Mara Hassler l’avertadad tranter Rumantschs e lur sentiment d’esser ina unitad.
Studegià medischina natirala
La nova collavura da la Lia Rumantscha ha fatg la matura bilingua, ha passentà ils davos onns a Basilea, nua ch’ella ha studegià quatter onns medischina natirala e lavurà trais onns en la clinica antropologia da Arlesheim. Dasperas la plazza tar la Lia ch’è dotada cun 40%, lavura Sina-Mara Hassler per il mument vinavant a Basilea, nua ch’ella lavura en il sectur da la medischina natirala.