Siglir tar il cuntegn

Header

video
Nova punt per Clugin
Or da Telesguard dals 23.03.2023.
laschar ir. Durada: 3 minutas 36 Secundas.
cuntegn

Val Schons La nova punt a Clugin vegn en in toc

La fin mars è la punt sur il Rain Posteriur a Clugin vegnida stgarpada giu. La nova punt, ina construcziun da betun armà da 37 tonnas cun ina lunghezza da 52 meters vegn oz transportada al lieu en in toc cun in transport spezial. Alura vegn la nova punt auzada cun ina crana speziala al lieu.

audio
RTR live da l'installaziun da la punt
ord Actualitad dals 19.04.2023. Maletg: RTR
laschar ir. Durada: 5 minutas 59 Secundas.

La nova punt sur il Rain Posteriur è vegnida transportada en in toc al lieu. Il transport spezial è partì la notg passada da Rapperswil-Jona cun dus vehichels d’accumpagnament. Avant uschè in transport ston ins sclerir la ruta, en quel cas qua era la lunghezza da 52m da la punt la sfida, perquai saja il radius da las stortas fitg impurtant sin il traject.

video
Film accelerà da l'installaziun da la punt
Or da Giuventetgna dals 19.04.2023.
laschar ir. Durada: 36 Secundas.

Puncts delicats haja dà l’entschatta cun sortir da la fatschenta a Rapperswil-Jona, tar la cruschada d’autostradas Reichenburg e lura puspè suenter la sortida da l’autostrada a Ziran. Tenor la fatschenta da transport saja tut i bain, els sajan perfin stads pli sperts che planisà. Enstagl da las quatter uras planisadas per il transport è la nova punt gia stada al lieu suenter trais uras e mez.

Suenter che la punt è vegnida auzada sin las pitgas preparadas è ella vegnida fixada e serrada. Sco proxim vegn uss betunà ina platta sin la construcziun d’atschal, quella sto vegnir isolada, lura vegn l’entira punt asfaltada e las bandas vegnan montadas. Las lavurs dessan esser terminadas mez fin l'october. Proxim onn suonda la segunda part pli pitschna da la punt, suenter sto il traject tar la cruschada anc vegnir auzà.  

Da la veglia punt resta tocca da betun ed atschal

La punt sur il Rain Posteriur a Clugin tranter Andeer e Ziràn è vegnida spazzada la fin marz. Ella è stada cun ses 75 onns en in schlet stadi. Ina sanaziun n'avess betg bastà, cun quai ch’ins haja durant las examinaziuns constatà che la punt stoppia esser dus meters pli auta pervia dal privel d'inundaziun.

La punt da 55 meters lunghezza è vegnida tagliada en tocs cun ina paisa da 24 fin 69 tonnas. Quels tocs èn alura vegnids auzads ora cun ina crana, e partids en tocs. I resta: tocca da betun ed atschal.

Ins pudess pensar ch'in project da tala grondezza na saja betg propi en relaziun cun in aclaun cun 40 abitants. Il chantun saja dentant obligà da far quai, di Christian Hartmann ch'è manader da projectaziun tar l'Uffizi da construcziun bassa. Tenor la lescha haja mintga fracziun cun dapli che 30 abitants il dretg sin ina colliaziun cun ina via chantunala.

Las preparativas per demontar la punt avevan gia cumenzà l'onn passà. La pli gronda sfida saja stada la grondezza da la punt e la protecziun da l'aua di Philipp Stucki da Zindel SA che fa las lavurs. Ins haja stuì guardar che nagin'aua contaminada da tagliar il betun e tocca arrivia en l'aua.

Ulteriur access è bler pli lung

Per las 40 persunas ch'abiteschan a Clugin sin la terrassa a la riva sanestra dal Rain Posteriur è la punt la suletta colliaziun directa per ir ad Andeer u Ziràn. Fin l'october han els ed ellas ina pli lunga via per arrivar or da la val, il sviament maina tras ina via da guaud via Donat.

Ins haja tschernì la metoda la pli spert pussaivla per rumper giu e remplazzar la punt, ch'il temp dal sviament per ils abitants da Clugin restia uschè curt sco pussaivel, di Christian Hartmann da l'Uffizi da construcziun bassa. Fin l'october duai la nova punt sur il Rain Posteriur esser a fin.

Resun da la populaziun: encletga e critica

I na fiss betg stà necessari da far ina nova punt, di Burgi Mark. En ils passa 60 onns ch'ella vivia gia qua n'hajan ins anc mai gì problems cun auas grondas. I saja schon in pau stentus sch’ins stoppia ir a far cumissiuns u tar il medi. Clugin saja dependent d'Andeer. Ma ussa uss saja da sa disar vi da la situaziun.

Uschè ina punt na vegn gea betg construida uschè savens, quella era ussa passa 70 onns veglia, uschia ch'ins po schon viver cun quai uss.
Autur: Hans-Andrea Fontanta habitant da Clugén

Fitg pragmatic vesa Hans-Andrea Fontana l'entira chaussa. El stat gist da tschella vart da la punt ed ha ina bella vista sin il plazzal. I saja schon stentus, dentant sch’ins quintia la distanza ch’ins stoppia uschè u uschia ir sch’ins giaja per exempel a Ziràn, alura saja quai in detur da forsa quatter minutas, e quai possian ins schon supportar. El pensa ch’ins stoppia prender quai ruassaivel.

audio
Nagina punt fin october a Clugin
ord Actualitad dals 23.03.2023. Maletg: RTR
laschar ir. Durada: 4 minutas 19 Secundas.

RTR Telesguard 17:40

Artitgels legids il pli savens