Siglir tar il cuntegn

Header

cuntegn

«Val Surses Savognin Bivio» La nova marca na plascha betg a tuts

Dapi il matg fa la Savognin Bivio Alvra SA reclama cun ina nova marca. Dasper il logo è da leger «Val Surses Savognin Bivio» – svanì è Alvra. Quai na cuntenta betg tuts, da la val Alvra datti critica.

Sco quai che Tanja Amacher, la directura da l’organisaziun turistica ha ditg, hajan las 11 vischnancas dal Surses fusiunà il 2016. Perquai saja quai ussa stà il proxim pass logic, da nizzegiar il num era per la promoziun turistica. La nova marca «Val Surses Savognin Bivio» na veglia però betg dir ch’ins na fetschia betg era reclama per la val Alvra. Las purschidas da la val Alvra sajan impurtantas ed ins propagheschia ellas era gugent, ha ditg Tanja Amacher.

Albula n'è betg pli da leger sin l'inscripziun dal biro da turissem a Savognin.
Legenda: Albula n'è betg pli da leger sin l'inscripziun dal biro da turissem a Savognin. RTR, Federico Belotti

Critica da la val Alvra

Betg cuntenta cun la nova marca Val Surses Savognin Bivio è Seraina Schuler, la hoteliera dal Albula & Julier a Casti.

Nus essans surstads che Alvra è sparì or dal logo, perquai che la cuminanza è anc adina val Alvra cun Surses.
Autur: Seraina Schuler hoteliera a Casti

Ella na saja betg vegnida infurmada u dumandada sche quai saja er en il senn da la val Alvra. Uschia haja ella betg gì la schanza d’intervegnir. La directura da turissem, Tanja Amacher di ch’igl haja dà in inscunter cun represchentants da la vischnanca Albula/Alvra. Quels sajan vegnids infurmads sur da la midada da la marca.

Marginalisà il rumantsch sin pagina d'internet

Cun la nova marca è er la pagina d'internet vegnida surlavurada. Cun ina purschida autentica sa preschenta il turissem Val Surses. Il Rumantsch u pleds rumantschs n'èn dentant bunamain betg preschents. Il president da l'organisaziun turistica, Luzi Thomann, n'era betg conscient da quest fatg:

Il rumantsch è fitg impurtant per nus e nus duvrain el er adina en e-mails, publicaziuns u sin tavlas d'infurmaziun. Cun la pagina d'internet avain nus dentant segiramain anc potenzial da meglierament.
Autur: Luzi Thomann president da l'organisaziun turistica

Ma i dettia er bleras dumondas e sfidas. Ina da quellas saja la limitaziun da pleds e bustabs, la dumonda da rumantsch grischun u surmiran e natiralmain er l'integraziun dal rumantsch per ch'il giast chapeschia er il messadi.

RTR actualitad 07:00

Artitgels legids il pli savens