Radund 20 persunas da la firma da computers Cisco èn sa participads sco voluntaris per gidar ad embellir la punt sur il Rain Posteriur. Sco quai ch’in participant ha ditg envers RTR, sajan quests dis da lavur adina fitg dumandads, ed els valian era sco di da lavur.
Ina punt istorica
La «Alte Landbrugg» è ina punt da crap sin territori da la vischnanca Valragn. Ella ha dus artgs cun 2,5 meters ladezza ed è prest 40 meters lunga. Quest onn daventa ella 330 onns veglia. Construida è ella vegnida da Peter Zur da Bravuogn. Trais onns suenter la construcziun è ella crudada ensemen per part. Ella è però puspè vegnida reconstruida.
Malgrà ch’ella è vegnida donnegiada pliras giadas dad auas grondas, è ella anc oz existenta, e quai en in bun stadi. Ella vegniva duvrada pli baud sco access al Pass dal San Bernardino dals viturins da sauma. Oz vegn ella duvrada dals purs e da viandants.
