Siglir tar il cuntegn

Grischun Central Valragn ponderescha ina fusiun

Las vischnancas da Sufers, Spligia, Nufenen e Valragn pondereschan da fusiunar. Per quest intent han las quatter vischnancas deliberà in credit. Gia avant 9 onns è ina eventuala fusiun stada sin maisa, è dentant vegnida sistida.

In fegl en connex cun il project da fusiun en Valragn.
Legenda: Per il project da fusiun han las 4 vischnancas deliberà in credit. RTR, T. Poltera
La deputada Monika Lorez-Meuli en biro.
Legenda: La deputada Monika Lorez-Meuli sustegna ina fusiun Valragn. RTR, F. Belotti

«La fusiun Valragn è anc lunsch davent» di Monika Lorez-Meuli che maina sco deputada la gruppa da lavur. En l’emprima fasa vegnan ussa mess ils fatgs sin maisa e rimnà las infurmaziuns da las singulas vischnancas per insumma avair ina basa da discussiun.

Tenor la deputada dal Cussegl grond è il futur politic dentant mo pussaivel cun ina vischnanca fusiunada cun quai che las sfidas vegnan adina pli grondas. Da gist fusiunar cun Avras na vegnia il mument betg en dumonda. I na saja betg da surchargiar il char.
La nova vischnanca Valragn avess bunamain 780 abitants. E sche tut va tenor plan pudessan l’entschatta 2017 las vischnancas esser fusiunadas.