Sco quai ch’il president communal da Vaz, Aaron Moser ha ditg, saja il resultat fitg allegraivel, ed il grad d’autofinanziaziun da 260% laschia sa vesair. L’onn avant muntava quel a 189%. Las grondas differenzas a favur da la vischnanca hai dà en la furmaziun, il sectur da sanadad, il traffic e l’economia publica, è da leger en il messadi per la sesida dal cussegl communal. La pli gronda differenza hai dà en il sectur finanzas e taglias, nua che la vischnanca ha gì 5.7 milliuns francs dapli entradas che budgetà.
Damain conflicts tranter peduns e ciclists
Plinavant ha il cussegl communal da Vaz approvà per mauns da l’urna la revisiun parziala da la planisaziun locala, il traffic plaun e la zona da repaus per la selvaschina. Quella revisiun prevesa diversas midadas. Per exempel duessan vias da viandar che vegnan il mument partidas cun ils ciclists, vegnir separadas.
Tut ils detagls èn definids en in Masterplan Bike. Quel prevesa tranter auter l’engrondiment dal Bikepark Lai, ed il traject da cross country tar la staziun a val da la pendiculara dal Corn Cotschen, duess da nov pudair vegnir duvrada durant l’entira stagiun e betg mo per occurrenzas. Il concept per la protecziun da la selvaschina e dals utschels prevesa diversas mesiras a favur dals animals. Sco pitschna midada ha il cussegl communal decidì, da betg redimensiunar uschè ferm la zona per la protecziun da la cuntrada, sco quai ch’igl è notà en il plan.
RR novitads 17:00