La «Luziuswiese» valitescha la cumissiun plazza da sport sco meglier lieu per remplazzar la plazza da ballape actuala a la Via Sporz sut il Café Aurora. Uschia è la populaziun vegnida infurmada a la radunanza communala da Vaz da glindesdi saira. Per l’ina saja il nov lieu adattà perquai ch’ins possia nizzegiar sinergias cun las plazzas da tennis existentas, e per l’autra perquai che la Luziuswiese fiss en in lieu central damanaivel da la scola.
Al lieu actual da la plazza da sport datti l'idea da far ina zona da s’entupar, cun zonas per activitads sportivas e plazzas da giugar. La vischnanca vul tractar la «Visiun plazza da sport Luziuswiese» ad ina dieta da clausura la primavaira. Avant prest trais onns aveva Vaz ditg cleramain Na a la modernisaziun da la plazza da sport existenta.
