Sco quai che la vischnanca da Vaz scriva en il messadi dal cussegl communal, haja la vischnanca bain ina segiranza per attatgas da hackers. Tuttina dessi gronds impediments e disturbis tecnics e perditas da lavur tar in’eventuala attatga. Cun avair ina segunda plazza dad IT saja plinavant garantì in manaschi permanent dad IT era sch’ina persuna avess da crudar ora. Grazia la segunda plazza possia era l’infrastructura da software da la vischnanca vegnir modernisada. Quella na correspundia betg pli a las pretensiuns dad oz.
Ulteriuras decisiuns dal cussegl communal da Vaz
- La cunvegna da prestaziun «Kultur am Pass» è vegnida approvada. Uschia duess la cultura multifara da la regiun da vacanzas da Lai vegnir sustegnida vinavant e pli vast. L’uniun Kultur am Pass maina in secretariat cultural cun ina plazza da 40%.
- Per sanar las fossas dal santeri da Zorten è vegnì approvà in credit supplementar da 40’000 francs. La sanaziun saja necessaria perquai ch’il terratsch saja arschiglius ed uschia na saja la decumposiziun (Verwesung) da las fossas betg garantida.
- La revisiun totala da la lescha da persunal vegn messa en vigur sin l’emprim da schaner 2023. Tranter auter datti in’emna dapli vacanzas, e models da lavur flexibels duessan procurar per persunal motivà. Da reducir la lavur emnila da 42 sin 40 uras ha il cussegl communal refusà. Grazia la nova lescha spera la vischnanca da Vaz da pudair occupar meglier sias plazzas en l’avegnir.
- Per il center da sport a Lai fissi stà previs da crear ina nova plazza da 100% d’in guardiabogn. Or da la seduta è vegnì fatg la proposta da spustar la tractanda sin ina proxima seduta. La suprastanza communala sto ussa surlavurar la fatschenta. I manchian anc infurmaziuns ed arguments sco era ina strategia dal bogn, hai gì num. Tenor il messadi custass ina plazza supplementara 85’000 francs ad onn.
- Il postulat «reducir il tempo sin territori da la vischnanca» è vegnì respundì. In rapport dal biro da planisaziun Hartmann und Monsch descriva nua ch’i pudess dar novas zonas da tempo 30. La suprastanza communala vul en il decurs da quest onn decider, tge tocs che duessan vegnir persequitads vinavant.
- Il postulat «Cantieni» è era vegnì respundì. Quel prevesa tranter auter meglieraziuns tar eveniments che sa repetan regularmain. Uschia na saja fin ussa betg gartegià da survegnir in plaz fix en il plan da termins internaziunal tar differentas disciplinas da sport, hai num en il postulat. La suprastanza communala da Vaz è da l’avis, ch’ils giavischs dal postulat da la cumissiun da turissem sajan gia resguardads en il program da legislatura ed en la Strategia 2025+.
